第一次到伊利沙伯醫院睇醫生

 30/8/2011今天原本我們就出發去沙巴旅行，現在已經取消了所有計劃，大前題是先醫治好周老闆的病。

今天是第一次到伊利沙伯醫院睇醫生，預約了十時，姐夫(新哥)話來車我們，以免我們咁頻撲，非常感謝他。我們在惠利道下車就是腫瘤科大樓 (即R座)，先在地下大堂，拿住張預約紙去繳費處交$100，跟住就上五樓登記，登記完等叫名，之後再落四樓等睇醫生。到四樓時，有姑娘量血壓及心跳，自己磅重同度高，再去流小便驗蛋白，做完呢D簡單步驟，我們就坐住等，無耐就有個讀中文大學既學生來問我們可否接受問卷調查，份問卷是關於鼻咽癌的，我們當然接受，反正坐住又無野做，又可以幫醫院了解及研究病情，何樂而不為呢！

我們等了好耐都未有得睇，等到12:15pm至聽到叫名，入2號睇醫生，醫生姓余，佢已睇晒周老闆的報告及轉介信，已知道周老闆的情況，佢話周老闆是鼻癌不是鼻咽癌，個病幾罕有，醫院都不常見，現在他們會用醫鼻咽癌的方法醫療，因已經切除了腫瘤，所以就會安排做電療，醫生又解釋了做電療時的副作用，會喉嚨乾，口腔潰爛，皮膚潰爛，脫髮，牙齒牙肉亦會受影響，幾年都不可以脫牙，而有D人就算完成電療，他們仍然會口水分泌減少，時常覺得口乾，要時刻都喝水，有些更嚴重者會影響說話能力，要學習重新說話添。醫生話現在就安排一D檢驗及電療時的準備，有力共振、睇牙科及做模，因電療時輻射會好利害，影響身體其他器官，所以一定要做個模遮蓋身體以作保護。睇完醫生就去三樓約磁力共振及做模，而牙科就在另一座大樓，牙科有Lunch time的，大家要注意呀！我們去到就close了，要2:00pm再開。我因為無請假，所以沒有陪他等牙科，知道都好順利約到牙醫。而所有事情都在一星期內完成，醫院的辦事效率都好快呀！

再次多謝新哥，佢等了我們幾個鐘呀！

到伊利沙醫院排期

今早返工前，先到伊利沙伯醫院替周老闆排期。醫院範圍好大，我都不知去邊座排期，只好先去奶奶上次睇的外科大樓問，原來腫瘤科在另一面，是R座，位置就近惠利道，門口就有的士上落，幾方便。因為封醫生信寫得好清楚，我又帶齊所有報告，佢張  ID copy,個職員好快就比了個期我，是30/8/2011(下星期二)，估唔到咁快就有得睇。

放工回到家，見到遮住佢個鼻塊沙布有不少血迹，就替佢換了先，因為是第一次打開個傷，都有D緊張，表面是無傷痕的，這就是微創手術的好處，此終有傷口，一定會滲血，做手術後，將一些類似啫哩的物體放入鼻內，有助消炎及止血的，更換沙布時就要小心D，不可以大力按壓個鼻，因D啫哩會流出來，流太多出來就要早D回去覆診及早歲理。

周老闆仍然需要吃粥，因為不想佢郁動太多個口，而影響埋個鼻，佢應該仲要吃多幾日粥，以策安全。

出院了

今天比昨天更早出發去醫院睇周老闆，頭都無洗隨便束起就算，而且仲拿著2大壺粥及麵包，自己都覺得幾烏wer下。好想早D去到比D粥佢食，佢一定好肚餓，今天架巴士好多人，而且仲好塞車，去到醫院已經8:45am，激死我，越趕越遲。一出電梯就見到袁教授，佢已經巡完房，話周老闆好好，無乜問題，已簽紙比佢出院，9月1號回診所覆診就得，嘩！真係出得院啦！好野！我再次多謝教授的幫忙，真係非常感謝佢，教授辛苦你了，咁早就要巡房，有時仲要好夜至忙完。

周老闆精神好好，問佢痛唔痛，佢都係話有小小痛姐，此終是個傷口。反正醫院埋單出院需要一段時間，我叫佢吃埋D粥先，唔好餓親。養和醫院D效率比法國醫院快，不消一個鐘已經計好條數，我們已經有心理準備條數應該不少，之前因不知要做Pet Scan已是大約7-8萬，現在加埋總數是…$98，719大元，勁呀！好彩教授手術費收了友情價，如果唔係仲貴，因為麻醉師費及手術室費是跟醫生手術費比例收的。收到Invoice可以帶埋行李落地下大堂的會計部找數，不用上上落落咁麻煩。我咁大個人都未試 過Look Card Look 咁大條數，真利害。

找完數我話搭的士回家，周老闆話佢無乜事，不用搭的士，搭巴士就得，先坐小巴到銅鑼灣再轉巴士，不消一個鐘就返到屋企。回到去仲好早，休息了一個上午，精神爽利晒。周老闆回到家都舒服好多，佢都係食下睡下咁，多休息好快就會好，好快就會恢復體力。保祐周老闆快D好番，病魔遠離他。

迎接第二天的挑戰

今天周老闆要動手術切除鼻內的惡性腫瘤，因11:00am做，我預計他10:00am就要去手術室預備，所以我想早D到醫院倍伴他。雖然昨晚已經煲落粥，因要翻滾D粥，所以我就六點幾就起身，奶奶都睡醒了，佢見我在廚房整粥，就入來睇下，我叫佢不用幫手啦，我攪得掂，叫佢休息下，因為佢都仲係一個康復中的病人。

到我出門前，就冧住同奶奶講Bye Bye，就見到佢係度喊，自從知道周老闆患病後，她一路都好鎮定，唔驚咁，而且一路都無喊過，今早她終於哭了，我見到佢咁，我都好傷心，好想喊，但我忍住了，我唔可以喊，唔可以嚇親佢，要令佢平靜，奶奶話佢又幫唔到手，乜都要我做，走來走去咁頻撲，話辛苦我了，覺得自己無用，個仔唔舒服都乜到做唔到，我叫佢唔好亂想，唔好咁講，佢自己都係病者，只要佢保重好自己，唔好令我們擔心就是最大的幫忙，而且我平時只係玩食瞓痾，已經儲存了好多能量，亦會發揮我的小宇宙，所有嘢我都可以應付，不用擔心。

架巴士無乜人，去到紅磡好塞車，在銅鑼灣坐埋的士去到養和醫院已經八點九。周老闆剛剛起身，見到我就話我做乜咁早來，佢真係傻傻地，我點可以不陪伴佢呀！十點鍾他已要去手術室預備，佢離開病房時，我好想喊，但又唔想佢擔心我，我又要忍住。之後我就上下網，寫下blog,同朋友傾下計，十二點去買了個三文冶吃，繼續在房內等待。

一點九有姑娘通知我，佢已經做完手術，現在正在上緊房，唔夠五分鐘，他被人推進來，一見到我就就微笑及豎起手指公，見到佢可以做到呢D野，即係無乜問題，手術非常成功啦！而且佢精神狀態好好，並不太像剛剛動過手術咁，太好了，我可以鬆一口氣了。

因為做微創手術表面無傷痕，只是用一塊細沙布遮蓋住個右鼻孔，問佢痛唔痛，佢又話唔痛，都唔知真定假，佢更係費時我擔心啦！無幾耐袁教授就上來巡房，同我哋講手術順利，已經切除了所有腫瘤，如無意外，明天應該可以出院，咁快出院，係真唔係呀！教授咁有經驗，話出得院應該係無問題既，佢更係想幫我地慳番d住院費。

隔了一會，姑娘就拿了從周老闆個鼻度，割出來的腫瘤來比我們睇，我們確認了就再拿去做化驗，嘩嘩嘩，有好多粒，而個size，就好似珍珠奶茶咁大粒，真係誇張，好彩早發現，如果唔係都不知點算好。

因為全身麻醉，佢都係瞓下醒下咁。到五點鐘可以食嘢了，因為已經18個鐘無食嘢，所以好肚餓，佢食晒我煲既五大碗粥，仲食埋一大包麵包添。食飽飽，精神同體力都恢復了好多，可以自己走動。見到佢行得、食得、笑得，真係安心晒，暫時放下了心頭大石。九點佢又摧我走，我都想佢休息多D，所以好聽話咁就走了。

今天非常順利地完成手術，我亦放鬆了小小，因為個腫瘤暫時不會再繼續生長，危險性亦降低了小小，只要傷口好番，就可以進行下一步計劃，去政府醫院排期做電療。

我們聽取了各方面的意見，好多人都建議去政府醫院做電療，因為他的腫瘤罕見，私家醫生所見的病例不會多，可能會更加影響進度，而且電療費用可能要30萬，危疲保險又未必會Claim到，不如留D錢慢慢用，買下保品，睇下中醫調理身體好過。有朋友的朋友有癌症，好多人都是到政府醫院做電療或化療，他們都話政府醫院都好好，跟進得幾全面。

我希望上天仍然庇佑我們，一切都順順利利地進行。

迎接第一天挑戰

早上11:30到達養和醫院，我們都是第一次到這間富豪醫院，富豪醫院即係富豪醫院，感覺好豪華與高檔，工作人員服務態度良好、友善，令人舒服。

去到登記處辦妥手續，就過隔離會計部交Depos
it，出乎意料之外，它的Deposit仲平過法國醫院$3,000大元，只需要$4,000，真係估佢唔到。

時間尚早還沒有空置床位，所以安排我們先到18樓照正電子素描 (Pet Scan )。上面個Lobby好似某些航空公司候機室咁，全落地玻璃，可以從高處腑望馬場，仲有Coffe and Tea供應添，附送有明星明人睇，我就見到琴姐李香琴及趙世光個仔。周老闆照的時間是12:30pm，辦多小小手續，再見一見註院醫生，問少少問題就再等叫名。做正電子素描 ( Pet Scan )需要空肚及打一D含有輻射的做影劑，等個半鐘D做影劑發揮作用，至推個人入個素描倉，照的過程只需15-20 mins，由預備到完成約二小時。

照完後吃了少少麵包，飲了D水，再等了一陣就有房，有專人帶我們上房同拿行李，住12樓的房間，4人大房$990，房間大過法國醫院，空間感都大D，都係好靚的景觀，遙望馬場，床邊有獨立locker、衣櫥、夾萬，最利害是有獨立電視，個電視可以搞上搞落向前向後添，最勁一機幾用，仲可以上網，勁勁勁。

今天周老闆仲可以周圍走，我們就到附近吃飯。飯後回到去，就上下網看下電視打發時間。想等教授來，了解下今日照的報告，但等到9:30周老闆已經叫我回家，堅持唔比我再等，以免佢擔心我為有走，回到家，他就打電話話袁教授剛剛來了，Pet Scan報告無問題，D癌細胞無抗散去其他身體部位，可以放心，明天手術提早至11:00am做。袁教授真係好忙，竟然10:30 pm至可以巡房，辛苦佢了。

聽完電話，就立刻洗米用真空煲煲粥，等做完手術後可以有得食，自己煲會乾淨D，不含味精，手術後注意飲食會好D。攪下左，攪下右差不多12點至可以瞓。
明天又要接受挑戰了，我們已經準備好，我唔會驚嫁，即來放馬過來啦！

房間望出去的馬場靚景

房間概設施一概齊全

一機二用的電腦 ( 又可以睇電視又可以上網 )

 

初次知道他患上惡疾

上星期六，睇完耳鼻喉專科醫生後，知道周老闆鼻內有一個瘤，需要立即入醫院做更深入的檢查，星期日，五時入住九龍法國醫院，星期一早上做頭部電子素描，中午就要全身麻醉，由醫生切一小部分出來做病理化驗，睇下是否患上惡性腫瘤及是什麼類型的病。

等待報告的過程是非常痛苦及難過的，因診所是相識的，所以星期二下午，經過我苦苦請求之下，醫生就再替我打電話到醫院追問報告，但詳盡報告仍然未出，醫生只話因為周老闆的情況特別，所以需要更加多時間及更緻細地去做化驗，現在只知道他不是鼻咽癌，是一種特別腫瘤，醫院話要星期四至可以出到報告，仲要等多二天，我要點過這二天呀！

心情跌落谷底，心痛到不得了，上天好似玩我咁，這一年考驗已經好多好多了，舊年中秋節前老豆患上肝癌，做完射頻手術後己在康復，今年三月奶奶証實患上結腸癌，又要忙碌及擔憂一輪，到奶奶已痊癒，現在惡運又找上我們，自問我都是一個好人，點解要咁對待我懲罰我。 就算我係壞人，懲罰我就好啦，點解要選擇佢，周老闆係一個孝順仔，愛護家人、朋友，十分願意幫助別人的大好人，認識他的人都會認同我的講法，求你幫助我們，令我們順利度過難關啦！

星期四，一早就到診所聼報告，結果是前顱底癌 ( 鱗狀細胞癌 )，醫生話屬於一期，它比鼻咽癌好好多，治療的過程會比較簡單及後遺症無鼻咽癌咁大，我問醫生可否切除這腫瘤，但醫生就話不可以，只可以做電療。而且仲寫埋refer letter去睇腫瘤料醫生。

回到工作的診所，老闆知道情況後，就立刻找她的同學，港大外科學系耳鼻喉科名譽教授袁寶榮教授，早上他要做手術，所以沒有覆我們電話，直到差不多三時才收到他的電話，老闆大致上講了周老闆的情況給袁授授知，袁教授就叫我們即刻到他位於中環中建大厦的診所。

刻不容緩立即出發，約三點半去到，掛完號後，姑娘話教授剛做完手術，正在回診所，因之前已有其他病人等待看病，所以要等耐D，只要有得睇，等幾耐都無問題。約四點三到，姑娘第一個就叫周老闆入房，竟然比佢睇先，真係意外。

教授重新再做一次鼻內規鏡，及照下頸部超聲波，睇下頸部淋巴有無異樣，之後就再解釋，教授話周老闆的腫瘤可以先切除，等個腫瘤不能再生長先，然後再做電療，這方法先可以徹底令個腫瘤消失，及將復發的機會減低。我們對教授好有信心，所以決定依他的方法，先做手術，後電療。

教授非常忙碌的，所以他不能去太多醫院，只去養和醫院，一聽到養和醫院，個心驚一驚，係人都知養和醫院係富豪醫院，入親去的人都非富即貴，唔驚就假，無辦法啦！一定要入的，一定要醫好。姑娘替他book好23/8/2011 (星期二)的床位及做一個全身的電了素描，星期三12:30pm就做手術。

一功已經預備好，下一步就是怎樣話比高齡的父母及奶奶知這結果？最後我們決定隱瞞老豆同媽媽，返正只要我定時報到，他們一定不會懷疑的，而奶奶就不可能瞞了，因我們同住，遲早她也會知道的。奶奶知道後表面幾鎮定，仲識安慰我，叫我不用擔心，早發現無事的，佢可能不想我們反擔心佢，所以扮鎮定都唔定，而我為了他們，我也要堅強，樂觀面對，保護好身體，不可以比周老闆擔心我，佢要開心快樂，先可以對抗惡魔，我們會樂觀地接受未來的日子。

 

沙巴旅遊預備篇 (2)

去沙巴更係陽光與海灘，玩水上活動當然唔少得游水幾寶，我既幾寶就係傘、帽、太陽眼鏡、防曬用品等。上網睇好多朋友同2大牌子防曬產品，Ocean Point 同 Banana Boat，既然咁多朋友用過，我都唔執書買番支試下，但好奇怪，好多地方都無Ocean Point買，只有Banana Boat買，我只買了支蘆薈冰涼啫喱先，格過價後，最平就係卓悅($52.4)，而我想買的80度的防曬霜暫時無貨，遲D再買過。而用在面上的防曬我仲考慮用邊個牌子，我有Sofina 50+、Lancome 50、Chanel …。究竟邊隻好呢？真傷腦筋，每日試一支咁就可以比較到，回來再話比大家知邊隻得。

今次會玩浮潛同睇魚魚，幾經考慮都係買個防水相機袋，如果要買個單鏡反光機的防水袋要成千蚊，而且仲要冒險會入水，所以我就決定用個舊相機，而部舊機個防水袋只需要$280，化算好多，而且就算部機壞了都無咁心痛啦！個防水袋可以上網訂，而我就在旺角的星際城市買，價錢是一樣的，那裡有好多攝影用品買，我個 EPL1相機袋都起果度買的。大家可以先上佢個網，睇下你部相機用邊隻型號的袋，再去買，咁就唔會買錯啦！
http://www.dicapac.com.hk/home.php

• 亞洲, 旅遊

取消行程

因為周老闆患病，所以我們的沙巴之旅亦要取消。

機票經Airasia book，打電話去問過，如因疾病，有醫生証明信是可以取消機位的，它們的作法是先扣除每程機位的手續費，然後再將餘額放入你在Airasia的帳號內，3個月內再訂期他日子或其他地點的機票，仲可以幫人訂添，但是手續費我就覺得幾貴，好似我咁，我2張機票加埋其他雜項是$3482，但手續費就要$1240，係咪好貴呢？

自問是一個謹慎的人，每次去旅行我都會買旅遊保險，以防萬一，買個安心，今次亦不例外 。之前買旅遊保險都未試過索償，好似上次去日本立山黑部咁，因為日本大地震，要取消行程，但國泰假期就退回錢，我沒有損失，所以不用去Claim保險公司，但今次不同，我真係有損失，所以我一定會Cliam保險。去沙巴亦已經報名參加了 local tour( API Tours )及訂埋酒店，而且已比了deposit，D deposit  加埋要$1700，所以就打電話比同我聯絡開的Ryan，話佢知現在的情況，佢知道後就話幫我問下酒店可否退回訂金，如可以就退回給我，最後當然是可以退回，Ryan 話會叫朋友帶錢回來給我，非常感動，多謝Ryan熱心的幫忙，等周老闆好番，一定要到沙巴親自多謝Ryan 至得。

• 亞洲,旅遊

壞消息

因昨晚去了睇蕭敬騰演唱會，吃完宵夜回到家已經成點鐘，所以今日很晏至起身，每天起身第一件事就係熄 i-phone 叉電器，一看有一信息即刻睇下啦，點知看到了：「媽媽平安地走了，很安祥，不用給我電話，謝謝你過往的幫忙。」那一刻醒晒，怎麼會一點先兆都無，無聽聞她入醫院及大病，點解會咁！腦海一片疑問，但不可以致電給他問呀！她是我同學(斌)的媽媽。伯母再見了…

斌是我由細到大的同學兼好友，相識已28年，當年我、毛劍及斌可以話係三劍俠，我同毛劍住樓上樓下，而斌就住在我們對面的村屋，當年我們會一起返學，放學一齊去毛劍屋企做功課同玩。中五畢業後，我們各有各忙，各有各生活，已經不能像以往一樣時常見面，但係感情一樣無變過，大家都非常珍惜這段友誼。每次見面我們都好開心同愉快，我們會你話下我，我窒下你咁，就好似回到以前一樣，雖然己經過了很耐，但真係非常懷念當年的快樂時光。

斌在Facebook留了一段文字我覺得佢講得好啱，以下就是:
人的一生每天都在倒數，一早已知有今天，但永遠覺得自己做得不好，明天吧！明天做好一些，對她說一些感謝的說說，總好過對著一副軀殼說一些以為很感動的話，太遲，太多廢話了。這段話是送給我所有好朋友。

我知到他已經做得好好，伯母亦會知道及感受到，希望他會釋懷，好快就回服返以前的模樣。

其實我都想分享小小嘢，父母好辛勞咁養育我們，將他們寶貴的青春奉獻給我們，現在他們年老了，時間每天每秒咁流走，我們不會知道他們會那一天離開，所以，我們要好好把握時間，盡量陪伴他們度過開心快樂的每一天。每個人都有工作，都有家庭，工作忙碌，抽不出時間，並不是籍口，只要妥善安排時間，或將自已娛樂的時間，撥出小小給父母，就算是一個電話，就已經足夠，他們就會感到滿足快樂。不要失去了才後悔，才覺悟，大家要珍惜眼前人呀！

快樂的童年

我好幸運生長在這個家，由細個到現在，他們都非常疼愛我，我係感受到的。

小時候 ，我們並不富有，只是住在板間房(一定好過現在的劏房好多)，但童年過個好開心。我有二個亞哥，他們大我10年及5年，記得細個時，老豆同亞媽都要工作，所以，大佬返學就返下午班.，而老二就返上午班，咁樣他們就可以輪流照顧我。

早上，大佬會背著我去街市買菜同煮午飯，而下午，老二做完工課就帶我去公園仔玩，經過了咁多年，我仍然好記得這情景。因為我係孻女，所以老豆非常錫我，我記得我讀幼稚園時，他用了幾十元買了一條黃色花花裙仔比我，當時汽水仲係幾毫子一支，大家話條裙仔幾咁名貴呀！

到我讀中學時 (那年是1984年)，大佬已出社會工作，我們的生活環境亦有所改善，由住油麻地的板間房轉到沙田的公屋呀！比起板間房，間屋好大呀！沙田可以話係我成長的地方，雖然，現在它已經轉變了好多，但我仍然十分喜歡它，因為我的喜、怒、哀、樂也發生在此處。現在我們已經長大了，回望過去，仍然好開心同快樂。

老豆今年已經81歲而媽媽亦都75歲，我們要好好把握時間，盡量陪伴他們度過開心快樂的每一天。每個人都有工作，都有家庭，工作忙碌，抽不出時間，並不是籍口，將自已娛樂的時間，撥出小小給父母，就算是一個電話，就已經足夠，他們就會感到滿足快樂。

祝大家的爸爸媽媽身體健康，生活愉快

慶祝媽媽生日

 昨晚媽媽生日，我們去了觀塘鱷魚恤中心七樓的彩晶軒慶祝。彩晶軒係好彩集團旗下的酒樓，它的水準有一定保証。我們很喜歡到這裡飲茶及吃晚飯，它們的服務質素都幾好，大家都應該有試過，去幫襯仲要吃到一肚氣，這情況在彩晶軒應該唔會發生。

而它的食物都幾特別下，飲茶時大家都會叫叉燒包，一般叉燒包都會放上蒸籠，但這裡的同其他酒樓好唔同，是放在一個小沙煲內，上檯時還會淋一D水在煲外，大家會聽到喳一聲，開蓋時有陣陣香味，未食已覺好味 ，還有D洋蔥墊住個叉燒包添，仲有要試下蘿蔔腸粉及漢堡包仔，都幾得意下。

講番昨晚，菜單有:

片皮鴨( 因為這道菜供應量有限，要預定呀 ) 、苦瓜炆鴨件、冰鎮鵝肉卷、欖角醬烤排骨、雲腿高湯水東芥菜、大都督砂鍋魚頭、蒜香鹽酥加拿大桶蠔、黑松露炒雙蚌、炸子雞、冬瓜盅及壽包一打氣再加4罐汽水。每個菜都好好味，價錢又合理， 仲送生果盆添。

與家人共聚實在是人生一大樂事，父母年紀越大，我覺得更加要抽多D時間陪伴，無人會知道，上天會何時帶他們去天堂遊玩，人離去後才覺悟及後悔，就已太遲了，所以珍惜眼前人真係至理明言呀！

Pokka Cafe'

最近去了2次Pokka Cafe,有九龍灣德福廣場及旺角雅蘭中心的鋪。無可否認它的食物真係幾好味，買相亦都幾靚下，所以吸引到好多人幫襯。

我們本身有張八折咭就快到期，欠幾佰蚊就可以續，所以最近去密小小。上是期六晚，五點九個字德褔店已經要等位，我們五個人等到六點半至有位，真係好多人。店內的裝修都幾靚，幾有歐陸味，當晚有二個晚餐，一是燒羊安另一個是大蝦配燒骨，而且晚餐有餐包及餐湯，還有甜品附送添，我們各要了二份，另加公司三文治，再另加了二個甜品，木糠布甸及焦糖梳乎里，，分量剛剛好足夠我們分享。

昨晚因為在雅蘭中心睇牙醫，所以貪方便再次幫襯 Pokka Cafe，呢間個裝修就無德褔咁靚，平實小小，食物都唔錯。晚餐都係有二個，但我們今次只選擇要牛肩扒，另外一個好似係乜乜豬柳卷，我對豬真係麻麻地，所以就選擇Meun內的美食，最後簡了個韓式牛柳定食，還送麵(吏)湯，泡菜豆腐及青瓜魷魚，買相已一流，齋睇都覺得好好味呀！開開心心又一晚。

沙巴旅遊資料篇

                                                                     

反覆上網睇資料及旅遊書後，經過一番研究，我已經整理好D資料，自己覺得都幾詳盡呀！希望大家睇完比D意見。

海南雞飯

味雅海南雞飯茶餐室

從Wisma Merdeka行2-3mins到

 

意大利料理

1.       Little Italy

沙巴最多Local Tour旅行社的大廈--Wisma Sabah，隔離就係Wisma Merdeka﹐它對面就是，Little Italy

2.       Toscani’s (+60 88-242879)

在Waterfront 的長廊海邊，即不夜天隔離、Warisaw Square對面

必食推介: 芒果沙冰、鐵板虎蝦、四式薄餅(辣腸、三文魚、火腿、海鮮)、什錦前菜小食(焗蘑菇、馬利司麵包、芝士焗蕃茄)

* 5:00 pm 去 Toscan’s , 可以欣賞日落景色*

3. Lisa Rossa

在Jesselton Point 對入，Micasion Superstore 行前小小

 

海鮮酒家

1.  大茄來海鮮酒家

地址: 18,Asia City Phase 2A

在Asia City Mall,中華小學對面,即係富源果邊既商場

2,  珍珠海鮮酒家Sri Selera

地址：G/F,sedco Complex,Kampung Air,Kote Kinabalu,Sabah(雙天隔離)

必食推介: 奶油虎蝦、虎蝦刺身、清蒸野生筍殼魚

3.  雙天海鮮檔Twinsky Seafood

地址：no.9-12,Block A,G/F,sedco Complex,Kampung Air,Kote Kinabalu,Sabah

必食推介: 清蒸石頭魚、海蟹粥、奶油虎蝦、清蒸筍殼魚

 

早餐、下午茶

富源茶餐室  (Asia City內，Cititel Express Hotel旁)

Kaya多士、奶茶

怡豐︰喇沙麵

 

甜品

Secret Recipe  ( Waterfront對面 )

地址: C-G-07,Warisan Square,Jalan Tun Fuad Stephens, Kota Kinabalu 

 

夜市

Philippines Market菲律賓夜市 (位於 Waterfront旁，Le Meridian Hotel對面)

必吃小食: 燒雞翼、串燒沙爹、炭燒海鮮、水果(榴槤、芒果)

 

旅遊景點

1.  市立回教堂 ( 水上清真寺 )  City Mosque

2.  加雅街星期日市集 Gaya Street Sunday Market

3.  哲斯頓城碼頭 Jesselton Point Jetty

4.  敦馬士化大厦 Menara Tun Mustapha (有時間可行一行)

 

按摩資料

1. Warisan Sqaure,裏面有多家按摩店，兩小時全身按摩都是RM65 (一小時RM35)另加服務費及政府稅

D'Touch價格為Nett,不另加服務費及政府稅，沒有規定要給小費

http://dtouchborneo.com/home.html

2. 在 Le Meridien Hotel 對面,萬寧隔離有間，又平又好

3. 雙天飯店旁邊

 

手信

虎蝦 : 1.遠東海產公司 ( Hyatt Hotel 後面 )  

     2. 機場

雪條: 機場

 

酒店

1. Gaya Centre Hotel

市中心，房間比Cititel Express Hotel 大，價錢平而且仲望海

2. Gayana Eco Resort

Jesselton Point Jetty --> Gayana Eco Resort : 12:30pm、2:30pm、4:30pm

Gayana Eco Resort -->Jesselton Point Jetty : 1:00 pm、4:00pm

餵大魚: 9am

保育海洋研究中心: 開放時間  10-11am  or  3-4:pm

Happy Hour Free Drink : 6-7 pm

酒店住客可免費玩浮潛和獨木舟

• 亞洲, 旅遊