老豆再次入院做射頻手術

上星期老豆返威爾斯醫院覆診，電子素描報告話佢個肝臟的腫瘤長大了，所以需要再次入醫院做射頻手術。今次已經是這一年來第三次入院做射頻，之前醫生都解釋過，因為老豆個肝內有幾粒腫瘤，所以需要分開幾次做的。其實醫院都跟進得好好，每幾個月就會同佢驗下血，照電子素描等，好彩我們無去私家醫院做手術，如果唔係筆醫療費都幾勁，二次射頻加埋D其他化驗及檢查，我估計都要幾十萬，我們當日的決定真的沒有錯。

今日醫院打電話來通知，叫老豆16/10/2011星期日入院，有無咁啱呀！揀啱我生日就入院，激死人。無辦法喇，最緊要就係快D就手術姐。

拿回退款了

前幾日收到沙巴 API Tour 嘅Ryan電話，佢話已托人拿回D deposit錢給我，叫我等佢朋友電話，聯絡怎樣那回錢。星期日終於收到佢朋友電話，叫我隨時到旺角她的鋪頭拿回錢，今天去拿了，好開心，除了是可以拿到錢外，亦因為我覺得我們遇上了一個好人(Ryan)，他可以不幫助我，因那些錢是deposit，理論上是不可以退還，但他都幫了我，而且還對換回港幣添，真係非常多謝Ryan。當我去拿錢時，我當然是要多謝埋他的朋友，傾開計至知道，原來她們也是跟Ryan的tour而與他成為朋友的，我估Ryan一定是個熱情開朗同熱心幫助人的人，不然不會咁多人都讚佢啦，而我會搵佢都是朋友幫親過，覺得好介紹給我的，真係無介紹錯。

老豆的生日晚飯

上星期比較忙碌，並不是工作而是各式各樣的應酬活動，有星期四的喪禮，星期六到窩打老道的拉斐特出席朋友結婚的儀式，之後又要趕去觀塘好彩酒樓慶祝老豆生日，星期日再同老豆食多次飯，真係好忙呀！

去觀禮的拉斐特是一間最近新開的婚禮統籌公司，就在油麻地地鐵站隔離，地點都幾方便，可能朋友Book的是細禮堂，所以覺得細了D，呢類公司通常都是半小時為一part，但是我覺得當日好似好趕時間咁，乜野都好急，唔夠時間咁。我記得當年我們在伊甸園結婚時，好似時間充足好多，無佢咁趕嫁，而個禮堂亦大好多，仲靚D添。

觀完禮我就去好彩吃晚飯，可能觀塘鱷魚恤中心開了很多酒樓，所以令好彩無咁多人幫襯，本來我都是去彩晶軒的，因它設婚宴，無位我才去好彩。其實好彩D食物都OK嫁，當晚我們吃了芝士龍蝦伊麵、清蒸東星班、炸子雞、薑蔥生蠔、乳鴿、欖角排骨、啫啫通菜煲、金銀蛋菜心，生日當然有壽飽啦！D嘢幾好味，D龍蝦是美國龍蝦，只需要$9.8一両，所以埋單都唔係太貴。

而星期日先係老豆正日生日，所以就再同佢吃晚飯，而我就選擇了去九龍塘又一城的八月花，因為近年尾，所以好多地方都擺酒，我都係訂唔到檯，唔緊要因為只得4個人，我估wail in一定有位，我們六點鐘就去睇下有無位，答案當然係有啦！但就要7:30pm交還張檯。那裡最出名的食物是燒BB乳豬，真係BB豬，因為一隻豬只有14-16件，份量好少的，另外我還order了椒鹽豆腐、太雕玻璃蝦、菜茸鮮蝦羹、原隻鮑魚荷葉飯、迷你桶仔飯，一個叫清爽正的菜，其實是有4隻鮑魚加海蜇加青瓜的前菜，而甜品就叫了個拿破崙蛋糕，我覺得去八月花一定要試BB乳豬及拿破崙蛋糕，真係好好味。


這是好彩食的餸

這是八月花的餸

出席喪禮

昨晚是蔡醫生(我老闆)媽媽的設靈夜。因為我非常非常之細膽，所以我已經好久沒有到過儐儀館這類地方。

對上一次去已經是八年前，當時我同周老闆拍拖無耐，大約四個月到啦！而當時的先人就係他爸爸，我們本來已準備約好見面，但因為出了意外，我與老爺亦無緣見一面，而唯一見面的一次，就是我非常害怕的儐儀館了。周老闆都知我是非常害怕的，但佢希望我能夠出席，能夠比老爺見我一面，我雖然好驚，但我都想老人家無牽掛上路，唯有硬著頭皮衝呀！去完後我連續幾晚都睡不好，仲發惡夢添，你話我幾差勁呀！
點解我會咁驚去儐儀館，其實有段古既，話說我在7至8歲時，當時我的三公過身了，我們一家人當然要去那地方，回家後我就持續發惡夢，仲病了很久，睇醫生都不好，後來有親戚話我可能被嚇親，之後媽媽就用了些古方替我定驚，過了段時間我才好番，經過了這次後，我足足25年無再進入過儐儀館，咁你話我驚怕的程度有幾誇張。

年紀越大，面對死亡的幾會越多，我不應該逃避的，但我並不是害怕死亡，我只時不習慣儐儀館的氣氛，那裡的氣氛令我非常不舒服會好不安，好難解釋那種感覺。我應該要習慣去那地方了，因為我都年紀唔細，身邊亦已經有朋友的父母開始慢慢離去，有一些我亦應該要出席，上個月，本來我已準備會出席好友斌的媽媽喪禮的，但因周老闆要入院做手術，所以不能出席，點知一個月後，又有不幸事情發生，就是老闆媽媽。
因周老闆有病在身，所以我無叫佢陪我去，好彩有好友Winnie 同我去，一踏入去那裡，我就拖住Winnie，個心卜卜咁跳，好驚呀！因為採取基督教儀式，感覺係好寧靜，好和諧，沒有恐怖感亦沒有那種陰沈的氣氛。我們只需要低頭鞠躬，家屬回個禮，就攪掂，不像佛教或道教咁，又上香又會聽到D人係咁吹一D令人不安的音樂。我們坐低陪老闆傾下計，見佢都OK，不太傷感，此終婆娑都已經84歲，而且也算是不太痛苦咁離開，大家應該都會容易適懷D。老闆仲識講笑，話我定的花圈好大個，好靚，比佢激死人。我們逗留了一個鐘到才離開，當經過其他不是用西式喪禮靈堂時，我的恐懼感又來了，只好快快急步盡快離開。

大致上，今次我是成功刻服了到儐儀館的心魔，因為我睡覺沒有發惡夢，亦沒有睡不著，應該過關了。

這2次我訂花圈，都是幫襯尖沙咀的牛記花店，可以上網或打電話訂，都幾方便，本來上網已經睇了訂邊類花圈及價錢($650)，當我打電話去訂時，他們就建議我訂$500的就可以了，$500的已經好大體，人家有經驗我更係信人地，而且仲係平了添，親眼見到個花圈都覺得幾OK，又真係夠大體，不失禮嫁，覺得牛記都幾老實，不會亂開價，而佢D開張花牌都做得幾靚嫁，以前我都訂過。

老豆生日

今個星期日就係老豆81歲生日，話咁快又一年了。這一年過得好驚險，好似坐過山車咁，有高有低，有喜又有驚，有苦又有甜，真係非常之刺激，好難過的一年。

上年老豆生日前夕，知到佢個肝有個腫瘤，我們就提早替他做大壽，之後就安排佢入院檢查，當佢做完射頻手術，以為可以開開心心，唔夠幾個月奶奶身體又出現問題，是結腸癌，入院做手術後又忙碌了一輪，以為D衰運走晒，應該回復正常，可以繼續我玩、食、瞓、疴的生活，點知上天比一個更大的考驗我同周老闆，佢患上鼻癌，現在我已經接受了現實，會一同與佢對抗惡魔，我們會打勝仗的，因已經切除腫瘤，危機已減，只要做埋電療，完成後，一切就會過去，佢就會好番。

求求下你啦！希望過埋呢關比我休息下啦！我真的好疲倦了，支持唔住啦！

今年同舊年一樣，Book了觀塘的好彩酒樓同老豆慶祝生日，果度D食物唔錯嫁，大家可以去試下

再做頭模

 上星期五收到醫院電話，叫周老闆今天早上10:00再到醫院三樓做模部。原來他要再做多次模，醫生話，佢要做一個用腊做的棒塞住鼻孔的模，上次做的模無棒所以要重做，大家唔好以為好簡單，只是保一支棒，原來要所有程序再做過，又要再做電腦素描、再用水筆在面上mark位，整個個程就做了3個鐘，躺在電腦素描床非常辛苦，張床又硬又凍，攪到佢成個背部鬼咁痛。而在面上的水筆回家洗了幾次還未乾淨，睇怕仲要洗幾日至得啦！                   

伊利沙伯醫院牙齒部

 今日周老闆又去醫院行大運啦！12:00先到牙齒部照X-Ray，跟住下午2-5點再見牙醫。好好彩，12:30已經照完X-ray，仲過來搵我食Lunch，我們去了北海街翠華食。

食完佢就繼續下半場回醫院等見牙醫，我仲擔心佢唔知要等幾耐，張預約紙是2-5時見牙醫，沒有指定時間的，每次去醫院見醫生都要等2個鐘，但今日真係非常之順利加好彩，2點半佢已經打電話來話睇完牙醫了。醫生話佢D牙齒沒問題，沒有爛牙，因第日做電療時會影響D牙肉，所以要預先處理好D牙，有爛現在就要先脫掉，將來電療後，牙肉會好難埋口，好難像正常人咁正常痊癒，叫佢要習慣每天用漱口水，保持口腔清潔。五點半還要去睇袁教授，趁時間尚早，周老闆就去佢最愛去的信和中心，睇X Box 360遊戲碟，佢買不到心頭好。

每次去睇袁教授都要等大約九個字到，今日亦不例外啦！今次的清鼻過程，比上兩次順利好多，好快已經辦妥，仲唔係咁痛添。我還深深記得第一次清鼻的情況，那次真係印象深刻，我睇住個40幾寸高清電視，睇住教授利用內窺鏡，再用鉗又吸又挖，用了半個鐘至清除了鼻內大半污蹧物，好痛，周老闆眼淚都流了出來，好慘，佢痛到連晚飯都吃不下，仲要吃止痛藥添。而第二次都比第一次好D，雖然都攪了好耐，但痛楚減輕了。

睇完醫生，周老闆話要食好D，佢已經戒了口個幾月，好多嘢佢都無食，佢好乖，現在只吃豬肉、蔬菜同魚，所以見佢話想吃壽司，我就同佢食啦！由中建大厦行去IFC大約15mins，我們去千両吃，唔知攪乜，好多人等位，等了半個鐘至有位，哈哈…今日莫非是等待日。千両D壽司水準保持得幾好，好新鮮，雖然比其他貴少少，我覺得值窩，而最緊是佢開心高興。

掛住食忘記了影相，部份食物

2011中秋節

今年無乜心情慶祝中秋節，星期六就同周家在觀塘好彩酒樓吃，正日中秋節就回馬鞍山海港酒樓吃。每逢過時過節D食市、酒樓都十分擠擁，預定都要最少2-3星期，好的有時仲要一個月添，都幾誇張下。每次我們都會吃頭輪，即六點半的時段，因老豆同陳太不習慣太晚吃飯。

做節酒樓通常都會set定一D套餐，有4-12人的選擇，，因為我們都好細食，叫一個12人套餐通常都食唔晒，好浪費，所以我們通常都會散叫，價錢比套餐平D，又唔洗要吃一D唔鐘意食的食物。飯後，大伙兒沿馬鞍山海濱長廊回府，沿途都好多人，好熱鬧，男女老幼都興高彩烈，滿街都是燈籠，好有氣氛呀！

回到家，我們都應下節，吃下月餅及水果，月餅我們喜歡吃金華火腿月，仲要係奇華餅家的，之前都試過吃榮華及恆香的，但此終覺得奇華最好食。以前D老人家至喜歡吃金華火腿月，但我發覺現在多了人喜歡，唔知係咪怕吃雙黃會膽固醇高，所以吃其他種類月餅呢！一家人吃下傾下時間過得特別快，11點大家就各自回家，中秋節就咁就過了。

等周老闆好番，明年一定要好好慶祝人月倆團圓的中秋節。

另外為了多謝老闆的幫忙，今年買了盒朱古力月餅送比佢，送給她時仲比佢鬧到七彩，話我最近已經用了咁多錢，仲嘥咁多錢，佢無幫我D乜，只係打了個電話姐，佢都唔知佢呢個電話幾咁重要，老闆就是這樣，永遠都不喜歡人哋嘥錢，我亦買了盒送給袁教授，真係非常多謝他。

送給老闆的朱古力月餅

送給袁教授的朱古力

到醫院的日子開始了

 從這個九月份開始，周老闆就要時常到伊利沙伯醫院，上星期他就去了一次，做身體的模，今個星期就要去二次，星期一做磁力共振，星期三早上做頭部的模，下午就見醫生，都好忙碌下，現在他精神狀況好好，根本不像有病的人，可以應付到，所以我沒有陪伴他去，我不想浪費假期，留待他做電療時同，那時更加需要陪伴他。

星期日經朋友介紹去了葵芳睇中醫，診所在住宅內開，這個中醫是癌症聖手，屋內掛滿感謝的牌匾，癌症聖手、仁心仁術、再世華佗等。在我們之前已經有3個病人，到我們睇時，更係響朵，話係乜乜介紹啦！凌醫生話乜乜已講了佢知大約情況，呢個介紹人真係唔話得，凌醫生先問病情再把脈，佢叫我們唔洗驚，鼻癌好過鼻咽癌，已經切除，更加不用驚，現在就要先清除熱毒，及調理好身體去做電療，因電療過程會幾難埃，所以一定要好好保下身子，增強抵抗力，他開了5服藥，每天用7碗水煲成一碗喝，5日後再去覆診，佢只收了友情價，比出面D中醫平好多，真係要多謝介紹人呀！

昨日佢照完磁力共振就來找我吃飯，因星期日在葵芳的大商場吃了一碗唔好食的拉麵，所以就同佢去吃拉麵，佢好鐘意吃拉麵，時常都掛住日本新宿的拉麵館，等佢好番就同佢去日本走一轉，滿足下佢，鼓勵下佢。

聽聞氣功對佢的病有幫助，上網check 過，有一個叫「郭林氣功」的，它同伊利沙伯醫院中醫治療部合辦氣功班，連醫院都同佢地合作，應該有幫助呀！打電話去問佢就比了醫院中醫部的電話我，剛剛10/9/2011(星期六)有堂，$500大元六堂，星期六及日上堂，每堂2小時，真係像徵式收費，幾抵下，我知道有D氣功師傅收費每堂要$1,000元嫁。

只要是有人話好，而又不會有傷害的治療方法，我們都會試，好像有人話，早上空肚飲一杯馬鈴薯汁咁，他會自己去榨汁飲啦！現在早、晚都要飲一包為癌症病人而研究的營養飲品(速癒素)，仲有湯水及鮮榨果汁，再加埋中藥，每天佢都好忙碌咁飲野。

聽講速癒素真係好有幫助，有患癌的朋友飲過後，在做化療或電療時，嘔吐及其他不適的反應無咁大，而接受化療及電療前5日仲要每日飲3次，直至完成為止，D速癒素都有D難飲下，但無辦法啦，只要好，都要堅持，而且D速癒素仲唔平，幾貴下，一盒15包市面要賣$500-$520元一盒。

今日他又去了醫院，幫佢影了相，仲見埋電療的醫生，再解釋明天上午又要再做電子素描的原因，是想更加照清楚，以確定做好個頭模，等做電療時位置準確。醫院好仔細及謹慎，好多嘢都做足，我不知點解，好多時都有政府醫院出錯或醫療失誤，可能醫院實在太多人輪候，而醫生及護士又缺少，所以真係會忙中有錯，希望不會發生錯誤啦！下午就要去袁教授度覆診，真係忙呀！