電療後一星期 30 Nov 2011

今天已經是電療後一星期，一切都好好。不用每天一早到醫院，休息的時間多了，精神都好D無咁疲倦。

下巴同頸部的傷口已經開始好轉，但鼻上的傷口就差了，都係我衰，我唔應該同佢搽藥膏，越搽越衰。D藥膏係醫院醫生開既(Zinc  Cream )，醫生話等電療完後就搽，咁個傷口就會好快埋口，我更係相信，點知信錯佢，我只係同佢搽了一次，仲係搽咗小小在鼻上，佢就已經衰咗，不但沒埋口反而爛落去，惡化咗添。D藥膏奶白色嘅，好杰嘅，好難清洗乾淨，已過了一星期仲黐住在個鼻上，黑人憎到死。無搽藥膏的地方反而好番，傷口埋了，之前脫皮的地方都脫晒皮，變得光滑，真係信錯人。現在新長出來的皮膚非常嫩弱，早晚都會搽一隻沒有藥性的潤膚膚(AQUEOUS  CREAM  )，呢隻就對皮膚無傷害，但電療中不可以用，電療後就用作潤膚霜就好好。

開始好轉的傷口，比起上星期，簡直是天與地呀

佢仍然不能進食，口腔潰爛的狀況仍然一樣，只能飲奶，飲其他飲品會好喇及勁痛。前兩天，我叫佢試下搽一隻專治口腔潰爛、生痱滋的藥膏，佢起初都唔肯試，話成口都爛晒，邊搽得咁多，又驚又被我跌佢一鑊，(個鼻果單呀！其實都唔關我事呀！個醫生之嘛！真係黑狗偷食，白狗當災)，經我一番努力解釋下，佢都肯試下，搽了二日，真係又有好轉窩，範圍縮細了痛楚都滅小了，哈哈，終於對症下藥，其實我好早前已經叫佢用，佢死唔肯，如果早聽講，可能一早已經好番了。

現在各方面都漸入佳景，我同奶奶都好開心，因為見到佢當時的情況，我們又不能幫助，只眼白白望住佢辛苦加上非一般的痛楚，非常之無奈，真係好心痛。
一切已經完結，我們正邁向光明之路，重新出發，展開新生活。

最後的2次電療 21-22 Nov 2011

我們心情好到不得了，因為就快完成療程，黑暗離我們又遠了，開心的程度真是不能用筆墨來形容

第32次電療
又是一個星期的開始，可能是尾二的一次，周老闆的情緒非常高漲，好開心。傷口仍然未好，還有小小滲血，而口腔內的真菌，之前吃藥後已經好番，但現在又回來找佢了，但這些都沒有影響到佢的好心情。電療的時間快了好多，約五個字。周老闆同電療師講，佢口腔又長滿菌，條脷又流血，今日可唔可以見醫生，D電療師好好人，見佢情況真係有必要性，就幫佢約見醫生。電療完，睇埋醫生並不是太晏，醫生開了D抗生素同止血藥比佢。

第33次電療 (最終回) 
天氣好心情更加好，一切都非常美好。我們在電療室渡過了2個月，對那裡又愛又恨，希望以後都不需要再到這裡。最後的電療順利地完成了，終於可以放下心頭大石。電療師同佢講，最後療程完成了，祝佢快D康復，幾咁有heart 呀！D人成日話醫院D人好冷漠好死板，我覺得都唔係呀！本來電療完還要見皮膚科姑娘，但個姑娘有急事不能到，要明天再去過，有無攪錯呀！咁都得。
今天大家的心情都好興奮，因為知道完成療程後，一切的痛苦及擔憂，都已過去了，現在只等待皮膚復完。從今天開始，就邁向新的一天了。

現在他的傷勢已經傷得非常嚴重，希望不用再電療會慢慢埋口。
皮膚潰爛的程度，都是每個病人有所不同的，不能以周老闆作準，醫生、電療師及姑娘都係話佢係特別例子，而以我2個月在醫院的所見所聞，就真係無其他病友好似佢咁，所以，若有家人或朋友真係不好彩要做電療，亦不用太擔心會有呢D咁嚴重既情況架，周老闆係另類特別例子。

這是最終回當日的相片
以下圖片會令人不安

背部

右邊面及頸部

左邊面及頸部

第27-31次電療 14-18 Nov 2011

星期日又未夠八點又比樓上嘈醒，激死人，忍無可忍走去管理處投訴，我仲同個管理員一齊上去，睇下樓上究竟攪乜鬼，早又嘈夜又嘈，係咪癡線架。今次並不是正正樓上嘈，而是佢對面嘈，佢仲係度搞辨，話只在啄豬骨煲湯，有幾嘈呀！咁都投訴，果D並不是啄骨聲，因為D聲有成半個鐘，仲要係時有時無，叮叮噹噹咁聲嘅，我知佢又係度拆嘢，兩家人都係傻架。管理員話佢兩家人都會執D垃圾回家，拆D銅鐵出來再拿去賣，所以會常常發出嘈音，他們已時常比人投訴，但管理處都無辦法，每次只可以勸籲佢哋唔好咁嘈，唉…我唔係唔比你拆嘢，但你哋都唔好唔理他人感受，申時戌時都嘈呀！攪了一輪，返去再翻睡了一會。
中午，去了又一城吃個午餐，再行下街街鬆一鬆，買了件羽絨背心比周老闆，因為現在佢好怕凍，羽絨又保暖又輕身，佢着住都唔會太重太辛苦。

第27次電療
昨晚因為條頸好痕好痛，令到佢成晚都無乜點瞓，精神好差又好疲倦。無乜胃口，連早餐(鮮奶)都唔想飲，佢又作悶又作嘔，已經嘔了幾次，嘔一D痰及口水汾泌，每次嘔佢都好辛苦。
今天病友F要太太陪伴住來，佢的情況比上星期更差，舉步難行，講句話都用上九牛二虎之力，又係作嘔作悶，佢嘔到不能夠睡添，可能佢加埋化療一齊做，所以D副作用比較大，雖然皮膚沒有潰爛，但就全面變了黑色，好似中了毒咁，而體重仲滅了30磅添，D化療藥真係好毒呀！每個病人的情況都不一樣，各人亦有自己的痛苦，希望大家都快D平安渡過啦！
周老闆D皮膚越來越嚴重呀！耳朵內、耳背都損埋，而條頸就更加差，爛到塊表皮已經甩咗，可以看到D血清，D血清黃黃地黐笠笠嘅，好難清洗乾淨，痛到都無法形容。



  

第28次電療
昨晚辛苦到無瞓過，心情更加差，話都不想講，奶都喝不下，行步路都唔穩陣，要扶住佢，情緒非常低落，心情亦有D煩躁，今日是電療以來最差勁的一天。
以前佢係一個大頭仔，現在D頭髮甩了好多，個頭都細小了，輕撫佢個頭時，果種心痛的感覺非常之難受，點解會咁嫁！個頭都細了，咁個身又會剩下多少肉呀！
電療真係會令到病人及其家人都有好大傷害，病人要受痛楚煎熬，而家人就只可睇住佢受苦，甚麼都幫不到佢，真係好難過。
傷口範圍擴大了，我已經好小心同佢清洗，太大力又驚佢痛，又驚D傷口更壞，每次都是輕輕在上面印下印下咁，又要用針筒抽走水泡裏D水，每次都要用一個鐘洗傷口。



第29次電療
昨日吃回自己的止痛藥，晚上瞓覺好了D。精神比昨日好好多，行路都穩陣番D，心情就更好，仲講了好多嘢，而久違了的笑容又展現了，好嘢呀！電療完還要等見醫生，D姑娘見到佢D傷口，都係話乜傷得咁勁嫁！而醫生就只睇下佢個口腔，望了望係頸，見傷口嚴重就叫佢小心D處理，又問痕唔痕，開了D止痕藥膏、保濕Cream、嗽口水比佢，我們決定不會用D藥膏，因為驚搽咗個傷口仲傷，因有病友搽了，攪到成條頸爛晒，要住醫院，反正仲有四次，無必要節外生枝，一定可以捱過的。現在體重是61KG (134 lbs)，比上星期又輕了4磅。返到屋企，幫佢洗了傷口至返工。
晚上奶奶都話佢今日好好唱口，可能因為只餘下四次，佢心情特別興奮同開心，見到佢咁，我們都非常高興，因為黑暗就快過了。哈哈哈

第30次需療
今日一切都非常順利，個鼻30次的電療己完成，現在只餘下3次頸部的，好快就會全部完成了，好開心，更高興係D皮膚沒有差落去。
見到病友F，佢精神好D了，無昨天咁差，希望佢繼續努力，勇敢地捱埋果3次化療啦！佢話化療比電療辛苦好多嫁，好彩周老闆唔需要做化療，唔係仲大鑊。

第31次電療
昨夜落好大雨，早上還下著微微細雨，我好擔心會截唔到的士，因落雨Call的士是非常困難的，出乎意料之外窩，好容易就Call到車，謝天謝地。
今日是星期五，做埋今次又可以休息2天了，而且只剩下2次，好快就衝線了，非常之期待。餘下3次只需要電條頸，所以入去的時間比較快，5個字就攪掂，可能終點在望，周老闆D心情靚到不得了，就算是痛都好似無咁勁。而傷口因不用電療，應該會慢慢癒合，只要保持乾淨清潔，應該無乜大問題嘅。

最後倒數2次，我好期待，因為呢2個月真係好辛苦，果種辛苦，除了是身體疲勞外，心靈的痛苦比肉體的苦更甚。每天都會擔驚受怕，唔知佢明天的情況，唔知佢明天個傷口會唔會更爛更壞，身體負唔負苛到啦！呢D問題會不停圍繞住你，每日都會想D唔好既野，想好多負面嘢，好多時令到自己都有D情緒不穩，情緒低落。
過埋星期二，一切都會完結，只需要等待復完，跟住就會慢慢回服以往一樣，每天都是美好的一天。
小沙B公主又可以繼續玩、食、瞓、屙了…哈哈哈…

第22-26次電療 7 -11 Nov2011

完成了三份二次電療了，面部同條頸已經傷痕累累，每天的變化也很太。星期六條頸D小水泡沒有減少，仲多咗添，而且非常痕癢，仍然用消毒藥水同佢洗D傷口。到星期日，D水泡已經越生越大，比之前更加痕癢，耳朵內都有，仲有D水流出來，晚上就算吃了止痛藥同安眠藥都瞓唔到，成晚都痕到不得了，又不能用手 拗，怕弄破令到傷口發炎，佢只係用手拍打痕嘅地方，舒緩一下。D皮膚已經由紅變黑，好乾好嚡。呢幾日好似仲瘦咗。唉…餘下的次數佢會更加辛苦了

星期日傷勢

右邊頸部

下巴

 

左邊頸


第22次電療因為昨晚又瞓得不好，精神好差，連行步路都好似無力咁，去到樓下見有的士，問佢搭唔搭，佢竟然話搭，就知佢一定好疲倦同辛苦，佢係一個唔鐘意搭的士的人，時緣佢成日都比D的士司機激怒，所以盡量唔搭囉。
今個星期的時間都是8:15am，部電療機做了2個病人又話壞了，放射電療醫生就叫我哋等下，好快就整好，佢見到周老闆條頸同塊面的情況後，同我哋傾了一陣偈，醫生話佢D反應真係快，因為電的位置比較出，所以條頸同面會比較嚴重，跟住落嚟會更差，叫佢忍耐及努力。因為我要返工，所以無等待佢，十點鐘佢至做完，跟住搭的士回家。晚上回到家佢已經叫我幫佢洗D傷口，因為好癢，D水泡比早上更多更大，已蔓延到成頸同面，無一處是正常的，耳朵亦有水流出來。可以想像係幾咁癢與痛。

第23次電療今日天氣開始涼了(20度)，要更加小心身體，唔可以比佢冷親，呀係就大件事。今早Call了的士去醫院，等佢可以睡多一陣。佢入去電療室一陣，又出番X，唔係又壞機丫，不是壞機，而是佢個鼻太腫脹，不能夠塞條鼻蠟入鼻，放射醫生叫佢上3樓先睇主診醫生，再決定怎樣再做電療。等見醫生可能要好耐，佢叫我返工先，佢攪掂就Call我。佢11點到就攪掂，醫生話餘下的療程，可以不用鼻蠟，其實之前佢已經是忍住痛塞嚿鼻蠟入鼻，現在唔用仲好，不過唔用，會唔會個鼻更加傷呢？醫生又開了D抗生素、止痛藥同止痕藥比佢。
有姑娘朋友叫我改用鹽水(Sodium Chloride Irrigation)同佢洗傷口，會溫和D，而且一日可以洗幾次都得，呢D鹽水要去D大藥房至可以買到大樽裝(1000cc)$25，萬靈同屈臣士只有細支裝(25cc)。
D止痕藥吃了會令人好眼瞓，再加埋安眠藥佢睡得比較好，無咁痕癢了。

第24次電療天氣真係轉涼了，只得18度，加上又落雨，更加凍。可能落雨Call不到的士，只好去搭小巴，天雨路滑，周圍都塞車，等了好耐都無小巴。小巴去到培正小學又見有吉的士，即刻落車轉車去QE，去到醫院門口8:45am，已收到電療師電話問我X係邊。今日周老闆電療完，又要見皮膚護理姑娘，又要見醫生，我放半日假陪佢等，等佢無咁悶。點知去繳費時，D職員話昨天己見了醫生，所以今天不用再見，只需要見皮膚護理姑娘就得，真激死人，D人又唔講清楚，又沒有取消booking，白白浪費了我半天假。皮膚護理姑姑見到佢都嚇一跳，因為佢真係嚴重呀！姑娘話，現階段佢只能幫他洗傷口，無乜嘢可以做到，叫佢回家勤力D搽電療寶，又係嘥氣，仲叫佢下星期不用來，等電療完先再去找佢。有病友話醫生比了D藥膏佢哋搽，點知越搽越差，越搽越爛，所以只要勤力D同佢清潔D傷口好過。坐的士回到家己11點，佢連涼都唔沖，立即上床瞓覺，佢真係好疲倦好累，電療真係會令人情緒低落、意智消沉。我都好倦，見未夠鐘返工，我都上床瞓陣先。
瞓了一陣又要起身返工，好想繼續瞓呀！
晚上情況更壞，D皮膚更差，無晒精神，佢個肚好頂，好想嘔，可能是吃了D抗生素及止痛藥的副作用，無晒胃口，奶都唔飲。
體重是62.2kg (137磅)

右邊頸部

下巴


第25次電療今日D天氣比昨日更涼，正常人當然唔需要穿太多衣服，但病患者就要穿好多，他們的體溫比我們低好多，而且又進食得少，抵抗力又低，所以好容易覺得凍，着多件總好D。因為條頸潰爛了，電療時，他們會替他鋪塊保鮮紙保護住D傷口，再帶頭摸電療。一電療完，就立刻坐的士回家，會先睡一陣，休息夠至沖涼，今天要開住暖風機來沖涼，佢真係好虛弱呀！

第26次電療天氣暖番小小，又有乾燥，對個傷口都好DD，快收水D。好容易就Call到的士，個司機仲幾好添。見到同邨病友F，佢前2日剛剛化療完，所以精神好差，成塊面黑晒，佢話每次化療完，都會好辛苦，又嘔又頭暈又無力，成個人散晒。好彩佢D皮膚無潰爛，唔係仲慘呀！
電療時間，仍然係咁耐，出到來佢已經好倦，每天睡不好又太早起身，唔倦就假，好彩今日是星期五，可以休息2天。
傷口仍然好差，又紅又脫皮又不停出水泡，好爛好爛，看到D傷痕就知佢有幾咁難受幾咁痛楚。每次洗傷口都要用上半小時，要非常小心，好溫柔地去洗，太大力會整痛佢，又會令到傷勢加重。

下星期開始，是最後倒數的七次了，希望能夠平平安安地渡過，保持住現階段的狀況好了，唔好再壞落去就好了。

第17至21次電療 31Oct-4 Nov 2011

星期日不用返工，又不需要陪周老闆到醫院做電療，以為可以瞓晏D，點知未夠九點比樓上噪醒了，唉…比我瞓多陣攤多陣都得掛，我都唔知點解，樓上成日都鬼咁噪，有時六七點琢肉餅，零辰時分盅藥，搬傢俬，係咪儍嫁，投訴又無改善，比樓上激死。反正醒咗，點打發呢？可能最近太過身心疲勞，成身好疲倦好痛，好似比人打咁，靈機一觸，不如去按個摩，鬆一鬆，反正在屋企附近，就咁決定，但要12點至有按摩師，仲有幾個鐘點打發呢？我於是搭程小巴，去了又一城吃個豐富早餐，再逛了一陣街街，好爽呀！暫時可以忘掉煩憂。按完摩就回家陪周老闆，一天假期就咁就過了，我好希望有多幾日假呀！

星期一又是新的一天，繼續努力加油呀！第十七次電療現在每天出門前，佢都要完成幾件事先，擦牙、用藥片嗽口、吃2種止痛藥、3粒雲芝再加2粒海澡丸，平常人做呢D嘢會好快，他因為吞嚥非常困難及勁痛，所以會用上15mins至攪掂，而佢嘅早餐會在小巴上食(其實係飲鮮奶)。
做早場(7:45am)，應該電療到最後一次，都係呢段時間既左右，因為醫院一早已經安排好，所有病人D時間，除非有特別先會更改。直到現在，佢做電療的時間都仍然係比其他病友長，大約七至八個字到。電療完，佢陪我吃早餐，只係陪，不能吃呀！之後回家休息。

今天開始有耳鳴的感覺，而下巴就生滿小瘡，有小小甩皮，D鬚亦開始變軟，不需要用鬚刨，只用眉鉗輕輕一拔就甩，仲不會痛添。而個鼻同頸D皮膚就變了色，又紅又黑，仲非常乾燥，又不能夠搽潤膚露，只可以搽電療寶。

第十八次電療皮膚又紅又乾，仲好痕，非常難頂，我發現了佢髮尾中間位置，有一笪皮膚損了添，又不能搽藥膏，希望不要繼續損落去，不然就麻煩了，一個小傷口也會牽連甚廣。有個病友就因為條頸有個小傷口，2日唔夠就成條頸爛晒，個傷口好似被火燒傷咁，好大好深，

個病友話痛到入心入肺，又唔能夠暫停做電療，將個模壓住個咁既傷口，大家話幾痛苦同難受呀！
今天晚上開始，我幫佢輕輕清潔面同頸部，再搽電療寶，恐怕佢自已抹得不乾淨及太大力，令皮膚受傷。

第十九次電療今日電療時發生了小插曲，周老闆入去5個字到就出返來，我以為佢電療的時間終於可以縮短了，點知唔係呀！是機器壞了，所以要出返來，電療師話磨打壞了，技術員好快就會維修好，等15分鐘啦！周老闆原來已經做了三分二，只剩小小就完成今日電療，一陣又要再戴模再做，有無咁黑呀！電療完已經九點三，今天佢要見醫生，姑娘叫佢十點半至回來，醫生要巡完房至到，又有排等了，我要返工無陪佢等，叫佢去Pacific Coffe買杯咖啡坐住等，杯咖啡佢只係有得睇無得飲嫁，飲到就好啦！等埋見埋醫生已經12點，醫生都係循例問病，問佢乜問題，都話正常係咁嫁啦！晒氣！體重比上星期輕了4磅，現在是141磅，面都尖了，剛電療時，有149磅的，頭髮明顯溥了好多。

第二十次電療
電療室今天好靜，只有2個病友，一個亞伯是喉癌的，而另一個就同我們非常有緣既，佢同周老闆一齊做模，又同期做電療，他鼻咽癌中期，要電療加化療，比較嚴重D，他都係住起錦豐苑，仲係隔離座，而佢都係做電工嫁，幾Q呀！每早大家都傾下計，時間過得快D，無咁悶又可以交流下心得。
我覺得周老闆狀況開始差，可能晚上睡不好，好疲倦，成個人憔悴晒，佢話每天早上是最辛苦的，個口又痛又乾，好難形容比我知果種痛苦，有時佢會發抆憎，心情低落，呢D都係因為太辛苦同太痛楚，我知佢好辛苦好痛，但我幫唔到佢呀！我都好心痛，有時我會扮Q扮可愛來逗下佢開心，呢招有時都幾work嫁！

第二十一次電療
昨晚他睡不到，又要起身吐口水及汾泌物，因痛得好利害，又要不停含凍水，舒緩痛楚，攪到成個人散晒。每天早上都要更換枕頭袋，今次個枕袋傷得最重，有口水有汾泌仲加D血絲，幾嚴重呀！連床單都受到牽連，覆蓋範圍好大。因為佢無乜點睡，就等佢睡多一陣，想搭的士去醫院，點知你要搭既時候，通常都係無車嫁，反而有小巴仲要有位，幾幸運呀！去到醫院只遲了小小。因為遲到，押後了他的時間，所以我待佢入去電療後就走。今日有病友話，用新鮮蘆薈搽受損及紅腫的部位，有助改善疼痛，我就去了上海街街市買新鮮蘆薈，一大塊只$15蚊，好靚同好新鮮。佢電療完就來找我，要拿塊蘆薈回家先，佢真係好疲倦，笑容都無晒，快D返家休息下，因下午仲要去中建大廈覆診。
去到診所好多病人，企都無得企，姑娘叫我地落街行下，九個字到至回去。因中午無食午餐，有D肚餓，周老闆就帶我去吃麥歪記雲吞麵，我覺得幾好味，$30一碗值唔值就見仁見智啦！之後去了間好舊既涼茶鋪(回春堂)，飲了杯$6蚊雞的花旗參茶，好多人飲嫁，在中環區只賣$6蚊真係抵。7:30pm至到佢睇醫生，因為有耳鳴，先檢查耳朵，無發炎，是電療後的反應，而鼻腔內都好好，沒有被電傷，教授話最估不到反而是口腔的潰爛，是那麼嚴重，叫繼續吃止痛藥，叫佢努力加油，好快就會完成，因為佢瞓得唔好，我問可唔可以開D安眠藥比佢，幫助睡眠，呢D小小請求教援當然會幫忙，因為他也覺得瞓得唔好，對病情反而唔好，會加重病情添。診所姑娘讚佢犀利，個口咁痛同辛苦都仲咁樂天，咁勇敢面對，佢哋話好少病人會咁。

睇完醫生，回到家已經九點，等佢沖完涼，飲飽奶，我就替佢敷蘆薈，D蘆薈要先去皮，D肉是透明色嘅，滑潺潺咁，用刀薄薄地切開幾片，直接敷上患處就保。敷了約20mins，佢覺得有D痕，叫佢立刻除下，用水沖洗乾淨，可能佢敏感，不適合用D蘆薈。所以呢其他人用了好，並不是人人都啱囉。

今日佢D皮膚更差，塊面開始變黑，有小小脫皮，下巴同條頸起了D小水泡，呢D小水泡好易會被整穿，穿了就好麻煩，會受感染，好難埋口嫁。用了D 無酒精成分的消毒藥水同佢洗下D水泡，希望有幫助啦！

餘下的十二次電療，先係戲肉，會出現各種的不適反感，皮膚亦會開始潰爛及更加疼癢，精神狀況會越來越差，希望佢能一一克服，快D渡過這一關。

受損的下巴

右邊頸部