奶奶的回魂夜

今天放工後，要去買一D食物，預備奶奶的回魂夜。

 

慶幸搵到間好的殯儀公司，好多事情都幫我們安排好，又教埋我們點做，幾時要做D乜，預備D乜，一切寫得清清楚楚，仲打電話提醒我添，真係細心。
此終，做喪事有好多嘢需要注意，有人提醒，跟住去做，實唔會錯誤，個人覺得，呢D嘢唔可以錯law，因為，這已經係為奶奶做最後的一件事情。

 

有了前幾天做頭七的經驗，今晚應該會順利，雖然要準備既嘢多咗，我同周老闆已經分好工，希望唔會有錯漏。師傅計過時間，回魂是18號零晨三時至
五時，我們就要一點開始預備，攪掂所有嘢，就要回到自己間房，唔好再出來，直至天明。

 

我從來都未做過喪事，今次好多嘢都要去跟進、去預備，其實，我真係驚驚地，有D怕，但為了周老闆，我頂硬上，廢事佢理咁多事情，更加傷神。

經過了最近的訓練，我覺得自己個膽大了小小，希望到果日，我會唔驚，冷靜同堅強，照顧住周老闆。

 

回魂夜

人生第一次去殯儀公司

星期日，去了一處，我從來都無到過的地方，殯儀公司。我鼓起了好大的勇氣，同周老闆及叔仔入去。因為是朋友介紹的，所以都好細心，同詳細解釋我們知到，免於我們煩惱。

由細到大我都非常膽小的，好怕呢D地方，如果路過，我會兜路行。而殯儀館，因八歲時，在那裡被嚇壞過，所以幾十年都沒到過。

九年前，還未結婚，周老闆爸爸過身，我就去了一次，之後，我要吃幾日安眠藥，才可以睡覺，要一個星期才平復心情。

辦喪禮，有分佛教、道教、天主教及基督教。通常照先人遺願去辦，佛教就最簡單，只有4個尼姑念經，沒有太多儀式；道教就複雜好多，預備好多嘢，而且有6個師傅做儀式，做的儀式叫破地獄，其實，中式的喪禮，會令家人感覺更加傷痛，整個氣氛更加哀愁。

而天主教及基督教的儀式，就令人感覺服舒D，沒有太大的哀傷，因為環境、佈置好自然，像參加歡送會咁，大家會平靜好多。

在殯儀公司逗留了3小時，因為有好多事情要商量，有好多問題我們要注意，又要教我們頭七同回魂要點做，原來真係唔簡單，要注意的事真係好多，我們盡量去做，希望順利為奶奶辦妥埋最後呢件事！

呢3個鐘，我一步都唔敢行開，因為間鋪又有棺木又有骨灰盅，好恐怖，我好驚呀！我厠所都唔去，忍到完成了，急急去茶餐廳解決。

 

 

奶奶離開我們了

 我以為，死亡離我好遠好遠，但當佢來臨的時候，會殺你一個措手不及，你根本不能够招架，不能够逃避，不能夠不接受。

2012年11月8日零晨一時十一分，電話響起，心想有無攪錯，夜麻麻擾人清夢，一看是印傭打比我，立刻出去奶奶房，睇下發生乜事，原來奶奶跌到，亞花已經抱起了奶奶，放到床上，奶奶當時已經氣喘，沒有大反應，見到咁嘅情況，即刻報警。

當救護員到達時，情况已經很壞，需要急救，立通知叔仔，叫佢通知埋大伯趕住醫院。救護車只可以有一個家人跟車，我自己就搭的士去QE急症室。

我去到急症室時，奶奶仍然在急救中，當時真係唔知點好，等待結果是一件好難過的事情，一分一秒都好漫長。

大約一點九，急症室門打開，有個年輕的女醫生行出來，同我們講，奶奶已經過身，而且是在送院前，已經無生命跡象。我們聽到，眼淚不受控制咁流下來，個心好痛好痛。

我們根本接受唔到呢個事實，因為奶奶呢排都幾好，又有D胃口，又無乜唔舒服，只是這三天嘔吐得利害小小，這是吃了化療藥的反應，根本問題下大，當晚我仲同佢講，如果明天仲係咁，就同佢睇醫生，佢仲話好。所以，點解會係咁樣，點解咁快就要帶走佢。我真係好難過，無想過會咁突然，周老闆的痛比我更大更深，佢兩母子的感情好好，奶奶在佢心中的地位，無人能夠比得上的，認識周老闆的朋友，一定知道這一點，亦知道佢有幾咁愛錫及孝順奶奶，所以佢現在好傷心難過，我亦無辦法可以幫佢，只可以在佢身邊，陪伴著佢。

奶奶是一個文靜內歛嘅人，佢平時鐘意在自己間房內渡過，每日的生活都好有規律，早上去公園做運運，之後可能同2個老友記去飲茶，跟著去買(食送)。回到家，做下家務，睇下電視、睇下報紙，而佢最鐘意就係聽收音機。黃昏就開始預備晚餐，我同周老闆回到家，就可以吃飯。吃飯時，我們會傾下計，我講下診所D嘢，佢就講下報紙同收音機D趣事，有時D趣事，佢唔講我們都唔知添。

好多朋友會問我，或者有人覺得奇怪，點解我要同奶奶住，唔會覺得麻煩或者唔方便咩？我到現在都覺得無問題，更慶幸當初有呢個決定。決定結婚時，周老闆已經同我講明，結婚後，一定要同奶奶住，我其實真係無乜所謂，我覺得反正日頭要返工，只是夜晚有二三個鐘對住，問題應該不大，事實証明了，我們相處非常容恰，沒有問題，如果硬話要有問題，我想就係呢件，我係一個好鐘意買嘢既人，乜都買一餐，有時買了新既，舊既又唔捨得棄掉，有時奶奶就會出聲，大家唔好誤會，以為佢話我大洗浪費錢，其實佢只係想我掉咗D無用、同舊既，咁咪可以放多D新嘢law，但我就婆仔性格，唔鐘意掉嘢，好似垃圾婆咁，我們三個人住，屋企有三份二地方是我的東西。你話有幾多人容忍到，連我亞媽都話我過份，但奶奶就沒有話過我一句。

我同奶奶相處了八年，佢都知道我的性格，我是一個直腸直肚的人，唔鐘意講假話，有時巴拉巴拉就講了出來，有時開罪了人都唔定，好彩佢大人有大量，無怪責我。佢好鐘意同我傾計架，有D秘密連周老闆都唔知到。

已經五天了，我們仍然好掛念佢，經過佢房間，見到所有物品依然起度，但主人已經不在，心痛的感覺又湧上來，時間會過去，心痛會慢慢減少，但我們對奶奶思念之情是不會退的。

屋企多個人

最近屋企多了個人，就是印傭亞花。佢已經來了2個星期，大家都需要時間去互相適應。

亞花已經在香港做了四年，所以D廣東話都ok,可以同奶奶溝通到。

我們全部都是大人，亞花應該都會幾好做，只是清潔、買菜煮飯，奶奶暫時又可以自理，又唔洗佢太照顧，應該都唔會，好似其他印傭咁，做做下又話辛苦又話難做掛。
有好多朋友同我講，有D工人真係好衰架，你唔好以為對佢好，佢哋會多謝，識感激，好多例子証明係錯架，只要平常對待，唔洗刻意特別好，唔刻薄佢哋就得，如果唔係盞自己傷心。人心難測，我知道，但我仍然相信，只要你真心對人好，人哋亦會對你好，如果人哋反轉豬肚，咁都無辦法喇，唯有認命喇！依家有句話叫做，人在做，天在看，形容得好好呀。

之前，我放工，就買埋送返屋企，叫亞花煮。

今天開始，就叫佢自己去買，好彩佢都識路返屋企。

希望我們同亞花都相處愉快啦！

重新出發

從知道周老闆有鼻癌直到現在，已經一年零二個月了，好長的一段時間呀！

昨天，他到了養和醫院住了一夜，因為要照PET Scean (正電子素描)，聽講，養和部機是香港最好的，點解咁講，因為我老豆上2個星期，經威爾
斯醫院轉介去照，醫院D醫生係咁同佢講的。

今早已經出院，報告亦出了，是正常，暫時其他地方，沒有癌細胞的跡象，太好了。
現在，每六個星期都會到中建大厦覆診，每次都會照內窺鏡，睇下個鼻腔裡面的情況，然後再在頸部照超聲波，睇下有無腫瘤，密切觀察情況，每年
照一次PET Scean，呢D就都係之後會繼續做的跟住。而伊利沙伯醫院方面，周老闆都會繼續去睇，此終都是政府嘢，follow up一定麻麻地，因為實在
有太多病人了，好似周老闆咁，每次去覆診，都是問診，問下你點，有無唔舒服，唔會檢查下，佢9月睇完，下次的覆診日期是明年一月呀！好話
唔好聽，如果有事，死了都未到呀！所以一定要到私家醫生度follow呀，雖然係貴，但總好過延誤了病情，錯過了治療時間呀！生命、健康比任何
嘢都重要，有健康，怕搵唔到金錢。

過二日後，即11月份開始，周老闆就會重新出發，開始工作。選擇呢個月份，因為開始秋天，天氣無咁熱，佢會容易D適應，此終，佢的工作需要體
力勞動。另一原因是，個印傭都幫到手，可以放心交奶奶比佢照顧，可以叫做無後顧之憂後去工作。

暫時佢會做回老來行，睇下身體應唔應付到，佢自己話無問題，我就叫佢量力而為，如果唔得，唔好死頂，要顧住身體。我們無兒無女，並不需要為下
一代努力搵錢，生活壓力亦沒有大問題，所以，佢可以做一D輕鬆既工作。

等佢試下先，可能是我想多了，之前佢有個病友，做完電療及化療後，醫院只給了他2個月病假，之後就去開工都係咁啦 (佢同周老闆係同行) 。所以周
老闆覺得佢自己一定得。

希望佢一切順利，身體健康

2012的生日

今年的生日，臨時book了又一城的Dan Ryan's Chicago Grill吃。但去到門口，覺得只2個人吃，食物選擇會好少，一大班朋友一齊會適合好多，所以就去了對面的翰騰閣吃中餐。
因為是閒日，唔係好多人，環境都幾寧靜，好舒服下，可能年紀大咗，唔鍾意噪雜的地方了。

因為是大閘蟹季節，我們都叫了2隻，但就唔得囉，$128一隻，實在係太差，原全係無蟹味。
其他的食物就有，冷盤一碟，個冷盤有5種食物，每樣都好味道，跟住有炸蟹鉗，呢個超級好食，去幫襯的朋友一定要order，另外有芥末炸豬手，好野
味，最後一個是酥炸生蠔，麻麻地。埋單$6xx，都ok喇。
是日晚餐

吃飽飽，行了一陣電器鋪，我想買部平板電腦，方便睇戲。最近，我迷上了睇日本卡通片，海賊王及夏目有人帳已經睇完，現在追緊火影忍者，幾十歲先學人追卡通，真係儍。

周老闆話，下午，佢去買部平板電腦比我做禮物時，發現用中銀信用咭，有5%回贈，佢就無買，因為我有中銀咭，所以佢要着數，唔要驚喜，同我一齊去買，佢話無理由唔要回贈，咁笨啫，咁又有道理。
但最攪笑係…其實佢有張附屬咭在身，只係佢唔記得，而且，當比錢時，先發現，原來要買over$3,000先有回贈，激到佢呀！哈哈哈

買完禮物，打道回府。返到屋企，仲有驚喜呀！佢賣了個，我喜歡吃的拿破崙生日蛋糕呀！
龍島的拿破崙蛋糕

仲有一份用花紙包住的小禮物，佢話生日一定要拆禮物窩！哈…好可愛呀！係夏目有人帳隻貓貓老師呀！是保大吉的不倒翁公仔，超得意呀！
多謝周老闆 

Samsung  tab 2 & 貓貓老師

 

奶奶是初期骨髓癌

24 Sep 2012奶奶回QE覆診，抽骨髓的報告是初期骨髓癌。
醫生都解釋得詳細，因為是初期，所以可以吃化療藥治療。
化療藥可以分幾類，醫生暫時建議奶奶吃D，不需要比錢的化療藥，先吃一個月，再驗血，睇下有無改善，如進展良好，就繼續吃，但如果情況無改
善，又或者惡化下去，就要更改吃自費的標靶藥，D標靶藥大約二萬蚊一個月，而且吃藥後，D反應會機大，嘔吐、無食慾、脫髮等。

奶奶吃了2星期普通化療藥，大致上都OK，沒有太大反應。初頭的四日，要吃好多藥，所以有D唔舒服，小小嘔吐，她早上空肚先4粒，早餐後
就10粒，中午5粒，晚上12粒，咁多藥想舒服都難。
過完呢4日，情況好多了，平均每次都只是吃5粒藥，沒有不適了，精神都OK。

現在奶奶都幾乖，肯聽講，日頭肯飲營養奶，而晚上可以吃小半碗飯，又肯吃水果及飲湯。

如保持住呢個身體狀況，應該唔會有太大問題，只要繼續努力加油，佢一定會好番。

22 Oct 2012回去覆診，希望有更好的消息

奶奶骨髓癌

 上星期三奶奶回QE覆診，睇番第二次抽組織的報告。腸胃料醫生話，報告顯示，癌細胞並不是由直腸癌擴散的，依家可能是骨髓癌或淋巴癌，佢
不是血液料，所以又要轉介去血液料。

骨髓癌、淋巴癌好嚴重呀！

昨天，去了血液科睇醫生，醫生話係骨髓癌，要抽骨髓來確定是癌症第幾期，亦用來決定做邊一種治療，如果是初期，可以吃標靶藥或做化療。奶奶
初初唔想抽組織，驚會好痛，但醫生話唔係咁痛，而且唔抽，根本不能確定病情，亦唔知要點樣跟進。最後奶奶決定做，可能病情幾急切，醫院
排期亦好快，安排了星期四抽，而星期五就要再照電子素描，24 September 回去覆診睇報告，真係安排得好快。

最近照顧奶奶的責任，交了比周老闆負責，因為我們都要返工，印傭又未到，只有佢在家，所以佢要辛苦D喇。

奶奶仍然無胃口，每天吃好少嘢，有時只飲營養奶，越來越瘦，無乜精神，佢又唔肯落街行下，郁動下，醫生都要佢行下，不可以成日瞓，但佢
又唔聽話，唔肯食唔肯動，再咁落去，真係大件事呀！

入院抽組織

奶奶之前痛到嘢都食唔到，呢個星期已經慢慢好D，可以吃粥，精神都好好多了。

6 Aug 2012安排了入院，抽筋骨組織去化驗，醫生話唔抽唔知下一步點做，唯有聽講照做。

14Aug 2012回去覆診睇報告，我們都好緊張，因為以後跟住要點做，如電療、化療定係乜都不做，就睇呢個報告。
激死激死，去睇時，醫生話抽得得少，驗唔到，要再抽多次，有無攪錯呀！咁都得。

約了24 Aug 2012再入院，今次就一早9:00am入院，9:30am抽組織。

早上搭的士真係好困難，call了幾個字都無車，唯有在樓下等，終於有車，但就搭到一肚氣，個司機又兜路又無禮貌，行行下，話唔識得去伊利沙伯醫院，竟然叫我們落車，話唔收錢，幾賤呀！周老闆就緊係氣頂啦！唔係話唔收錢，你話落車就落車，一係車去差館，個衰司機話咁我真係唔識去，問題重點係，一上車已經知去伊利沙伯醫院，如果唔識應該一早講，或者問我哋點去，而唔係兜了路，比人識穿了，先話唔識，正一敗類，影響埋D好司機。周老闆仲話，我哋又唔係去沙頭角，只係去伊利沙伯醫院，作為的士司機應該知道點去，好懷疑你個的士牌點老番來，激到佢彈彈下。我哋無落車，佢只好繼續去，但就嘆慢板，根本佢就識路，無問我地又無call上台問。

好彩無遲到，上到七樓病房，做好基本檢查，姑娘已經叫我快D幫奶奶換衫，因為佢係第一個抽組織的病人，時間緊迫。換好衫D姑娘就推奶奶走，我們都要離開病房，等電話通知至回來接奶奶。

五點幾收到電話，話奶奶可以出院了。
今次無上次咁驚，所以奶奶無要求住院，返屋企點都舒服過在醫院。