有感而發

從知道老豆身體出現問題到現在，我都處於不安的心情。雖然醫院說會盡快安排他入院做射頻手術（約四星期），但在等候的這段時間，每天都非常心急及不安。這個月我皮膚乾燥、面黃黃，雙眼無神，成個人無理朝氣咁，自己都覺得老了好多咁，睇怕食幾多補品都補唔番呀，真係慘。

上星期終於忍唔住再打電話去醫院，今次個姑娘好好人，叫我留下電話再覆我。一天之後，真係有回覆，終於等到安排了。

老豆一路身體都好好，老人病(膽固醇、糖尿、血壓高等) 他全部都無，因後生時常常飲酒，所以個肝唔係好好，他只是在健康院覆下診，久不久驗下血咁，一直都無乜事。

直至五個月前，在健康院驗出來的肝癌指標比正常高出了小小，醫生就建議他做肝臟超聲波，大家都知道，要等政府醫院安排可能等到出年都未得，所以我們就自行去私人化驗所做，但做出來結果沒有發現腫瘤，由那天開始，我們就一邊睇私家醫生(鄧醫生)，一邊又繼續排政府。每個月都會驗血睇住個肝功能同肝癌指標有無繼續高，幾個月都幾好，直到上個月，肝癌指標忽然高了一倍，鄧醫生就建議做CT Scan，結果發現有一個腫瘤。這個小東西來得很快，令我無所適服，跟住找外科醫生(廖醫生)問意見，廖醫生話慶幸只是初期，可以用射頻方法醫治，廖醫生亦好好人，點解我咁講，因為我唔識佢而且之前都無幫襯過，而他亦願意將手術費收平D，可能他知我是個診所姑娘，都算係同行，所以有得商量。

雖然手術費係平了，但是如果在私家醫院做加上住院等等要約14萬，大家都知道這只是約數，如有其他問題就不是這數目了，可能是一個天文數字。經過商量我們決定先去政府醫院，睇下它們幾時可以安排到，如果等太久至去私家。

真係好好彩，一個月就安排到，真係要感謝上天，亦要多謝醫院。

經過今次我有一個小結論：如果有病去政府醫院，病者及家人都要明白病情、狀況，如果你們都不明白，很難會跟進到，其次是自已首先做好一D化驗先，現在好多私人化驗所同政府都有合作，只需要有政府的介紹信就有 Discout，其實都幾好，總好過唔知等政府排到幾時，排得到做化驗再去排期睇醫生就可能已經太遲了。所以一定要問多D，自已跟進多D，自已的家人亦不多關心及關注，試問其他人又怎會上心呢！