回顧2011年

今天是2011年最後的一天，回顧今年的日子，真係悲多於喜。上天在2011年，比了好多考驗我，我都已經盡力去完成，希望明年佢體量我，唔好再比咁多野我去闖啦！我只是個小女人仔，邊有咁多能力去應付咁多難關呀！放我一馬啦！

明年的願望是各人都身體健康，生活愉快。呢2個願望其實是好重要的，因為身體不健康，並不是個人的事，而是整個家庭的事，一個人身體有問題，其他家人亦不會好過，會為你擔憂及傷心難過，處於這個局面，生活又點會愉快呢？這是我今年深深體會到的。

而且，除了周老闆同奶奶患病之外，今年圍繞住身邊的朋友，好像都過得不太順利，有朋友在同一公司工作了幾年，但今年就突然與同事不夾，工作不順利，甚至要離職，又有朋友的老公有第三者，蘊釀緊離婚，加上我老闆媽媽過身，統統都在發生在今年，所以2011年我非常之討厭你，好彩過埋今天就完結。

展望新的一年，有美好的一天，每天都開心愉快
周老闆身體健康，癌魔遠離佢。

嘗試去茶樓吃點心

            

已經電療完一個月了，周老闆的精神好番好多，頭髮亦已經甩少了，但他仍然未能夠食太多嘢，每次都只是試小小，因為有D食物，會令到佢好唔舒服嘅。而體重就有上升，有124磅，好好呀！

聖誕節26/12/2011，周老闆話想試下去飲茶，幾勁呀！嘢都唔食得，學人去飲茶。我當然會陪佢去啦！我們四個人(我、周老闆、奶奶、叔仔)去了九龍塘間翰騰閣飲，去果度因為比較容易攞位，又寧靜D，現在我哋好怕人又多又噪的地方。

我哋叫的食物有:
叉燒酥(周老闆至愛)、叉燒飽、帶子腸粉、牛肉腸粉、冰鎮豬腳仔、菜苗餃、山竹牛肉、珍珠雞，佢每樣都有試食，但只有腸粉佢覺得最好，其他的點心就令到佢係脷有D不舒服。其實咁樣已經好好，再過一個月應該可以全面回復。

一個月後，就農曆新年，我不能再做大話妹了，如繼續講大話，我家的兩老一定會懷疑，點解新年，周老闆仲未從澳門回來過年，▕所以周老闆你心急好番，都是正常嘅，雖然這是個善意的大話，不希望佢哋為你擔心、傷心，但大話此終不能講太耐，終有日會穿煲。

平安夜

今年聖誕節有3日假期，好開心呀！
因為呢個星期病倒了，亦可以利用這個假期，好好休息下，而且又可以在家多D陪伴周老闆。自從佢病後，每天我都要返工，只得好少時間可以陪伴佢，雖然佢時常都話唔駛我陪，但多個人在家，多D聲氣，無咁寂寞呀！這是我的想法，可能佢並不應同，覺得我在家仲阻住佢添，哈哈。
平安夜好凍呀，只得10度，四點鐘已經放工，那那淋返屋企，可能食了藥，好疲倦，回到家瞓了陣，至落街吃飯。之後就睇明珠台的戲，每年聖誕都會播D愛情戲，咁啱呢套(緣份精華遊)未睇過，又不是太舊嘅，都幾好睇。平安夜樓下十點鐘到，會有人唱聖誕歌，佢哋都幾利害，我住22樓都聽得好清楚。

明年的聖誕節，我想我同周老闆一定不會安份地留在家，因為佢一定會安排好節目，覺得要補償回給我，佢現在一定覺得好內疚，放假都不可以同我去玩，這就是佢。

從新出發《日本中部》

這是個遲了一年出發的中部遊，本應是今年4月份去，因奶奶患病及日本311大地震而取消了行程。由去日本中部改了去沙巴，但臨出發前2星期，亦因周老闆突然其來的疾病而要取消。今年我們與外遊有沖突，一話出門旅遊，就發生不能預計的問題。希望明年的計劃會順利成行。

前2星期，第一次用Asia Miles換機票，都幾順利，不過就欠小小運氣囉！事原就係咁，中午check 機位時，還有由香港到名古屋嘅直航機票，點知，到我晚上真係換時，竟然只有去程直航，回程已經要停留台灣，直係激死人，只是幾個鐘姐，就無了，真慘慘慘，無辦法啦！唔駛錢就更係多人要啦！只怪自己優遊寡斷，無當機立段即時換！之前成日聽聞用Asia Miles換機票好難，通常都要預早成年換，今次唔知係咪D人仲驚去日本，所以我咁遲都仲換到呢！

我 book 了明年四月尾的機票到中部旅遊，只要請5天大假就可以去8日。而且仲係早機去晚機返，去程就10:30am起飛，回程就17:05pm (停台灣一小時)，呢D時間真係好到不得了。
因為之前已經參考了旅遊書，又上網睇了好多資料，做足功課，所以行程一早已有蓋略。中部我最想去的地方是《立山黑部》及《白川鄉》，因為立山黑部每年四月至十一月至會開山，而最令人期待的雪之大谷，亦都只會在四至五月才有得睇，所以我就選擇了四月尾出發，而且，可以黐住幾日公眾假期一齊放假，就唔會嘥太多大假，現在我請5日大假，就可以有8天假期，好着數呀！

如無意外，我的行程應該就如下:

22/4/2012 15:20 到達名古屋-->松本
23/4/2012 松本-->立山黑部-->富山-->金澤
24/4/2012 金澤
25/4/2012 金澤-->白川鄉--高山
26/4/2012 高山-->新穗高溫泉
27/4/2012 新穗高溫泉-->高山
28/4/2012 高山-->土岐Premium Outlets-->名古屋
29/4/2012 17:05 名古屋-->香港

中部出名好玩的地方，應該已包括在我的行程，本來之前會去日本三大溫泉之一的下呂溫泉，但終合其他網友的評價後，那裡太商業，失去了原有風味，反而不及高山奧飛驒溫泉，所以就更改了浸溫泉的地方。酒店的價錢，2012年比2011貴了好多，之前只是￥6800,現在就要￥8800，加幅都幾大，幾日D酒店加加埋埋都多了成萬幾￥，無計啦！唯有買少D野，慳D錢錢，幫補下啦。

電療後3星期 13 Dec 2011

踏入第三星期，皮膚已經好得七七八八，傷口已經埋晒口。

口腔仍然未好，仲繼續搽住藥膏，亦是以奶為主要的食糧，不過就開始慢慢試飲雪梨水、甘筍汁及魚湯，呢D就沒有喇唎，沒有令佢辛苦。晚上瞓得幾好，口水分泌減少了，不會再弄濕枕頭，亦不用時常起身吐痰吐口水，口乾的感覺仍然有，一乾就喝一口水，保持濕潤，口乾又唔得，濕又唔得，幾咁矛盾呀！但已經比之前好好多了，精神亦越來越好。

這星期，天氣非常寒冷，只有11-14度，而我哋住嘅地方只得9度，更加凍呀！屋企有暖爐，但就沒有開，因為開住暖爐會令室內好乾燥，驚會影響佢D皮膚，令佢皮膚癢癢。只好叫佢多穿衣服，雖然沒用暖爐，我亦預備了個暖水袋比佢，希望幫到手啦！無咁凍啦！羽絨被當然不能缺少，羽絨被傳熱的速度比其他的被快，睡上床好快就暖，唔會凍冰冰。

星期日，佢試食其他食物，有白粥、魚肉、菜、拉麵、麵包浸鮮奶等，全部都OK，沒有不良反應，應該可以慢慢試食番其他野了。

星期一，佢陪我返工兼陪食早餐，佢試吃米線，都得窩。我返工後，佢仲話想去 Starbucks 飲杯咖啡添！既然佢咁好興致，我當然無阻止啦！之後佢仲去了深水埗行街街，玩到成四點至返到屋企，玩了幾個鐘都唔係好疲倦，仲好開心添。吃了2大碗粥，再吃了個稻庭烏冬，好好胃口呀！

星期二，佢已經唔係好想吃粥，因為D粥唔飽肚，佢想吃米線及烏冬，中午奶奶買了半斤米線比佢吃，全部吃清，而晚上就吃了2個稻庭烏冬，好利害！
嘩嘩嘩，好嘢呀！終於可以慢慢進食，可以食番嘢，就會慢慢恢復元氣，好快就會復原，正呀！
體重仍然是122磅，沒有再減少落去。
期望下星期，一切都會更好更順利


這星期的皮膚狀況

電療後二星期 7 Dec 2011

完成電療已經2星期，一切都良好，皮膚已經好了六成，只欠口腔同舌頭潰爛的部份未好。

每晚睡前我會幫助佢搽藥膏，因為口腔及舌頭位置自己好難搽得到，而且口腔是濕笠笠的，D藥膏真係幾難塗抹上去。搽了D藥膏佢就覺得時好時壞，反反複複咁！真係難攪，因為咁，到現在仍然不能進食，都只係靠飲營養奶及鮮奶！支撐住身體，真係慘。對於一個為食貓來講，真係幾難頂架。佢D體重，由剛電療時148磅，到現在只剩下122磅，足足輕了26磅，二個月無了26磅好勁呀！
因為無食嘢，加上電療後的副作用，佢D低抗力亦低了，身體好虛弱，時常都會覺得好冰冷。這幾天，氣溫有18-20度，佢都覺得好冷，需要着件厚料衛衣、羽絨背心再加件錦褸  ，你話幾誇張，身體幾咁弱呀！以前佢是一個非常怕熱的人，最愛就是呢D天氣。

已好了六成的皮膚


前二天佢收到病友F的電話，佢話不用再做餘下的3次化療，現在已可以吃稀飯，精神都幾好，問周老闆皮膚好D未，進展好嗎？知道F的好消息，我們也替佢高興，因為每次做化療後，佢都會辛苦到不得了，現在不用再做，只是等待復完，太好了。大家都要努力加油，快D康復。

聖誕節就快到了

不知不覺原來已經12月中了，最近忙著周老闆的病，都忘記了聖誕節已經來臨。可能自己無乜心情，覺得市面都好似無乜聖誕氣氛咁。
年紀越大，對節日的感覺越淡然，只會覺得是多了一天的假期，可以不用返工而已。

以前，我都會預先訂一間餐廳吃聖誕晚餐，但近呢2年就無訂，只會買D牛扒、羊扒、羅馬生菜回家自已做聖誕大餐。
現在覺得聖誕節在外邊吃飯，簡直是任人宰割，同一餐廳同一菜式，比平常貴一倍以上，而且果日會有好多人， Service又差，價錢又貴，何必要貼錢買難受呢！你話係咪！自己煮味道雖然無餐廳咁好味，但就可以慢慢品嘗，不用趕頭趕命，比人係咁催你走囉！每逢過時過節，好多酒樓都已經只會供應套餐，有時都幾激氣，點解呢？因為好似我哋一家人咁，本身都唔大食，根本就食唔晒套餐的餸菜，又浪費又唔環保，我估好多家庭都好似我哋咁。

周老闆剛剛身體好DD，但仍然未能食到其他嘢住，所以更加無必要去同人迫，而且人多車多的地方，都唔係咁適合佢去。
下星期應該都幾凍下，凍先似過聖誕，先至好氣氛！祝大家聖誕快樂

中環蘭桂芳Favaca Wine & Grill

早前經facebook 的www.couppie.com團購買了二張這間餐廳 (Favaca Wine & Grill) 的Coupon，每張$88 元，2人可用一張，如此類推，可以選擇德國脆皮燒豬手或半打紐西蘭生蠔。

蘭桂芳的租金非常昂貴，所以間餐廳都幾細小，大約只容納到50人。地方雖然細，但食物質數非常好。我們4個人order了 凱撒沙律、煙肉焗薯皮、烤羊架、海鮮墨汁麵、德國脆皮燒豬手及半打紐西蘭生蠔，全部都好好味，隻豬手皮脆肉淋，D生蠔好新鮮，羊架亦好出色，D肉好嫩。因為有Coupon埋單只是$580都幾抵；如果正價德國脆皮豬手$268，半打生蠔$228，亂中中都比我買到好嘢，真好彩。我同周老闆一定會重臨，因他好鐘意食咸豬手嫁，而且這地方D食物真係幾好。

P.S:佢哋仲送餐包都非常美味

如果各位大食就要order多D嘢食，因份量都偏細小小

地址:中環蘭桂坊雲咸街31號地下C-D舖

電話: 28823872

凱撒沙律

紐西蘭生蠔  

燒羊架

海鮮墨汁麵

德國脆皮燒豬手

煙肉焗薯皮

• 飲食