奶奶又入醫院了

奶奶昨天回伊利沙伯醫院覆診，醫生睇完Pet scean後，就話除了T6的骨有癌細胞外，盤骨及肋骨都有異常，可能肋骨影響到佢食嘢咁痛。
昨日就算唔食嘢，肋骨位置都開始痛，又痛又食唔到，所以醫生就收佢入院。醫生話會在肋骨度抽D組織，確定D癌細胞是在原位，定係其他地方轉移，仲要
照胃鏡，睇下食道的情況。

唉…痛苦現在先開始，只有奶奶自己去承受呢D痛楚，我們根本唔能夠幫助到佢，只可睇眼白白睇住佢辛苦。奶奶終於意識到病情的嚴重，佢不停話今次大劑，我們
只有安慰佢，話好快會無事。

其實，我們已作了最壞的打算

情況差了

星期日開始，奶奶覺得唔舒服。
佢唔想食嘢，佢一食嘢，就覺得心口好痛好辛苦。佢話昨天食香蕉時，比條蕉哽親，之後就覺得好痛，總之食乜都痛，飲流質嘢都唔得。呢二日，佢只係飲D加營素，
全日只飲了二罐，邊會頂得住呀！昨晚，我就用凍水開了D葡萄糖水比佢試下，佢話好D，飲落去無咁痛。

我哋都知道，唔關條蕉事，但可以點解釋，唯有安慰佢，吃D止痛藥，話好快就會無事，忍耐下。見到佢咁，我都好唔開心，我知道痛楚只會越來越大，越來越痛，我
沒有辦法幫到佢，只可以多D同佢傾計，分散佢D注意力，叫奶奶飲多D嘢，保持住身體。

希望星期四去QE覆診，醫生可以幫到佢，減輕D痛楚啦！                   

請印尼傭工幫手呀

因為奶奶的身體會越來越差，所以我們決定請個印傭。

其實早在2年前，她做完腸手術後，已經話請，但佢話唔鐘意屋企多個人，及佢可以照顧到自己，所以打消了這念頭。今次就唔到佢話事，無得 say no。

僱傭公司是病人開的，所以有D保証，應該會介紹D好D的家傭比我。佢哋自己到印尼果邊揀人，我就會到佢哋公司，同D印傭視像，我無呢方面的經驗，會同有經驗
的大姑奶一齊去揀，希望有心水啦！

請了半日假去揀印傭，間公司己經幫我篩選了二個出來，我們就二揀一。科技先進，為我們帶來方便，視像會面，幾好呀！起碼可以睇真D個樣，同身形，唔洗估估下。二個都是，唔會亂咁來既。最後我們就揀了個41歲，離了婚，有2個小朋友的，年紀較大，應該比較會定性D，又有小朋友，更加穩陣D，唔會隨便就唔做。現在請，都要約2個月至來到香港，好耐下。

下一步就是19July覆診，睇下醫生有無其他治療可以做。

現在，周老闆做住傭工先，每天都會買早餐、煮午餐比奶奶，好似好忙咁！

奶奶病倒了

上二星期，高高興興咁從加拿大回來，以為只是老人肌肉痛，沒有想過會是這樣的。

奶奶臨回來前的幾天，，已覺得背部開始痛，已經在果邊睇過醫生，都係話肌肉發炎，吃D藥就好。上機時，情況都沒有改善，仲越來越痛，佢堅持上機，坐完十幾
個鐘機更差，行步路都唔得。

第二天24 June 2012，立即同佢去睇骨科醫生，照X-ray同骨質疏鬆測試，醫生估計可能是骨質疏鬆影響，D骨collapse了，所以壓住D神經線，打止痛針加吃藥，星
期一覆診。吃了藥止了少許痛。

星期一27 June2012回去覆診，醫生問奶奶覺得點，痛有無減少，因為骨質疏鬆報告正常，佢想奶奶去照埋MRI，再確定病情。醫生叫奶奶出去等，叫我留低，其實
我都感覺到嚴重性，X-ray 報告話，T 6的骨出現異常，都建議進一步化驗，確定係咪癌細胞擴散。

我聽到呢度已經喊咗出來，點解又來呀！我剛剛先至離開鼻癌的陰影，提起勁來，你又要整我，玩我，想點呀！

盡快去安排做MRI，明天8:00am就可以去法國醫院做。

我同周老闆七點就同奶奶出發，截了3個字先截到的士，想坐就無車，唔坐就週街都係車，真激氣。照的過程順利，好快就攪掂。

等待結果是最辛苦的。好彩識人，只需要一天就有報告。

星期三中午，就收到朋友的電話，話報告已經出了，立刻落去攞。

好不幸，醫生話係癌細胞擴散，即係骨癌。

唉…只是二年，咁快就擴散，而且仲係毫無先兆，我真係接受唔到，之前佢仲好哋哋，行得走得食得，點解咁架！

知道結果後，佢哋比我堅強，比較接受。我可能真係唔夠成熟，仲要繼續去磨練，去學習面對死亡。

我哋唔知點樣同奶奶講個病情，最後決定，星期五到伊利沙伯醫院覆診時，由醫生講。奶奶問了我幾次報告出咗未！

星期五29 June 2012，大姑奶同叔仔陪奶奶去覆診，佢哋去到，等了5mins就有得睇，真係估唔到。

據佢哋講，醫生先同奶奶檢查了直腸，又講番D驗血報告，話一切正常，幾好，無乜唔妥。之後，她們就比份MRI報告佢睇，個醫生重覆睇了幾次，就好溫柔咁問
奶奶，邊度痛，點痛，又再同佢檢查下個背部，話D骨有D問題，緊住又問奶奶有無特別嘢或者緊急嘢做，如果無，不如今晚留院，再驗清楚！奶奶更係話好啦！
就係咁就入了院。

最Q就係，佢又睡番上次做腸手術的床位。五點幾我們去探佢時，姑娘就話，骨科醫生同腫瘤科醫生要見我們，我哋陪同奶奶由A座去到R座3樓，R座…腫瘤大樓，在
半年前，我們有個半月時間就在這裡渡過，所以我同周老闆對R座並不陌生。而且去個R座，亦即係代表你是癌症病人了。

骨料醫生同我哋講，以報告同臨床診段，已經肯定是癌症擴散，而且擴散的情況好快，如果再遲D發現，可能已經影響到對腳，不能行路。而佢就建議做5次電療，
等個病情控制住及止痛先。

入得醫院，唯有信醫生，我們決定跟住做，今晚就立即電一次先，做電療是需要做一D預備的工作，又要計劃份量及mark位，電療部本來收六點，因為奶奶緊急，所以
要令到她們開OT，她們無不高興，而且仲好細心添，真係要多謝佢哋，因為遲了成個鐘至收得工。攪掂晒D預備工作，就落番地下，等候做電療，等了半個鐘就到奶奶，
入去3個字到就電完，周老闆第一次電時，差唔多用了9個字呀！唔同位置，電的時間亦有分別。

電療完，奶奶並沒有不舒服。回到房，已經過了探病時間，我們亦不能夠逗留，需要離開。


接下來的幾天，除了星期日及7.1假期，每日奶奶都要電療，而且第三日，由A座轉移到R座七樓病房，方便去電療。而痛楚亦開始減少了。
七樓病房的病人，全部是癌症病人，好多病人的情況都好差了，奶奶算是最精靈的一個。癌症真係會折磨到一個人，沒有了生存的意智。

6 July 2012星期五，醫院話已經完成5次電療，暫時沒有其他治療可以做住，可以出院了。醫院做了一件硬膠背心給奶奶穿，除了瞓覺之外，一定要穿著，等佢D骨
唔好再collapse，唔好再差下去。亦幫奶奶安排好星期一，自費到香港體檢照PET Screan，醫院refer有八折，平二千幾蚊。照了就知道，其他部位有無癌細胞，咁醫
院先知道之後的安排。

唉…究竟之後會點，等到星期二就知道了