家務助理

因為奶奶正在休養當中，所以很多平時佢做開的家務都要停止，直至到佢完全康復。

奶奶平常負責的家務，現在就要我負責，有買餸煮飯啦，清潔屋企等。但因為我返工，很難兼顧到咁嘢，而且中午時段，亦都需要有人看住奶奶，以及煮午餐佢食，本來想請個家傭，但奶奶及周老闆話唔係好習慣有個陌生人起屋企，所以我們最後決定請個家務助理幫住手先，家傭就容後再談。

經樂活一站請家務助理，它們會根據你既住址介紹合適人選比你，前後都要2個星期先有人試工。而試工前，我們就需要替家務助理購買一份家務助理的保險，初時我以為家傭先要買保險添，這保險都幾抵買，一年大約$150，是跟家居地址的，不是買梗一個人的，即是你可以隨時換人都得，咁又幾靈活。

第一個來試工的很差勁，煲湯都可以煲瀉，成個爐頭都污蹧晒，洗窗簾又拆剩D扣，就放入洗衣機洗，真係激死人。第二個就是小余，她很好，家務做得妥當外，都幾細心，初初奶奶行動不太自如，她會扶上扶落，有時又會陪奶奶去公園散步，有一次直情替奶奶剪腳甲添，幾唔話得呀。因小余不只讀了家務助理課程，而且還讀過離院護理，所以會比較細心D同明白病人需要。我們非常滿意她。

由當初一星期來六天，到現在只需要一、三、五來，小余幫了我很多，而且有她在家，除了做家務外，亦可以陪奶奶傾下計，奶奶都無咁悶。我會每2星期寫一個菜單交給小余，她會跟住我的菜單買餸啦，預備好餸菜後放入雪櫃，待我放工後自已煮，大大減少了我的工作量。

到現在已經請了小余四個月了，一切都好順利，佢亦好幫忙，我自己亦可以不用咁忙，還有時間攪下左攪下右添，即係無所事事，繼續我的玩食瞓屙世界，哈哈哈

真係要多謝小余