就快到泡瀨漁港，在左邊轉彎之際，2至3秒間，突然pop一聲，氣袋彈了出來，架車停了，我聞到一D燒濃嘢嘅味道，發生得太快，我根本唔知發生乜事呀！
OMG……
反應過來後，我知道，我們撞車了。我只被氣袋撞到，有小小痛，並不嚴重。當下，立即睇下周老闆，見佢暈咗，當時好驚，驚佢有事，本能反應，我用手探下佢個鼻，睇下有無呼吸，再摸下有無脈搏，謝天謝地，好彩有，跟住幫佢除了安全帶，再開車門，大叫Please Help Help ，當時已經有好多人圍觀，亦有好多好心人來幫助，有人打電話報警，有人幫忙整低坐椅，等周老闆舒服D。我叫佢，佢有反應，叫佢唔洗驚，唔洗怕，我起度，已經報警，救護車好快到。
過了一陣，警察同救護車一齊到。救護員先替佢檢查，叫佢(郁)下手、腳、眼睛，問有無甚麼地方痛，不舒服，佢話無呀！好彩，我放心D了。
跟住我又拜託幫我報警的大叔，打電話到OTS租車公司，話我們撞車，現在要到醫院，部車點處理？OTS話我們先去醫院，處理傷勢，部車佢哋會派人拖回機場的公司，但D拖車費因為超出了範圍，要我們自己比，費用￥15,000，我當然會負責。其實，當時我都唔理得咁多，最緊要老公無事。
我跟住救護車一齊去醫院，在車上，周老闆好似清醒D了，問我有無受傷，仲同我講唔好意思，佢都唔知點解會咁，明明好哋哋，點解會咁，又話影響了個假期，對唔住我，佢正白痴，果刻仲咁講，最緊要佢無事，假期算是甚麼。
好快就去到醫院，當時真係好似睇日劇咁，在醫院門口，已經有醫生同護士等待，他被推去急症室，一路行個女醫生一路問我當時的情況，希望佢聽得明我講。在急症室佢做檢查，我就在出面向警察講解意外的經過，當然是雞同鴨講，再加身體語音，同埋好彩我租了wifi，可以用翻譯功能，但中文譯日文都唔係咁可信，希望佢哋明白啦！
在出面都繞壤了個幾鐘
，當我再見到周老闆時，佢已經做了檢查，照了x-ray，同CT，仲打緊點滴。佢好似已經無乜事咁，但就話，唔記得頭先發生乜，不知點撞車，只記得撞了車，跟住就瞓了在醫院，吓…唔記得，佢連救護員及救護車上的事情都無印象
，咁大單，不要嚇我呀！隔了陣，有個好年輕的醫生來了，用有限的英文解釋了周老闆的情況，話佢無骨折，腦部無事損傷，叫我放心。可能剛剛發生意外，影響了記憶，叫我不用擔心，醫生建議佢最好照一照MRI(磁力拱震)，因為他們找不到原因，點解周老闆會突然間暈咗，第一時間，我問這是否急切，醫生話不是，可以遲一步做都得，既然唔urgent，我決定返香港至做，因為在日本做了，報告也是出日文，我們也不知道佢講乜，回香港可以詳細再檢驗，找回自己的醫生睇會放心好多，個醫生都同意我的想法。
但是，今天周老闆就要留院觀察，睇下情況，無乜特別，明天至出院，咁我點呢？我問護士，咁我可唔可以留在醫院，陪伴佢，可能她們知我們是遊客，都好禮遇，話留在醫院陪伴無問題，但就沒有地方比我睡覺，太好了，可以留低，怎能奢望仲比埋床位你睡。
周老闆在急症室內的床位休息，我就沒有停過，因為意外，我要取消之前安排好的行程，首先打電話去Kafuu Resort Fuchaku Hotel and Okinawa Marriott Resort & Spa 取消booking，她們都好好，知我們交通意外，沒有charge我，跟住又要book番那霸的Hotel。
之後，醫院D職員，叫我打電話去OTS,原來佢哋話，部車已經拖回公司，而且，他們會派職員拿行李來醫院比番我，同埋了解下情況，嘩，太好了，不用我操心D行李。
警察局派了個懂國語的女警來查問，因為溝通到，他們已經完全明白意外的情況。非常感謝那女警，因為她還替我與OTS的職員做翻譯。
大約六點鐘，OTS的職員推着我們的行李來到了，他問了我病情，跟住就叫我檢查下D行李，最後就問下意外的情況，又叫我寫底當時情況，佢話可以寫中文。跟住叫我比￥15,000拖車費用，我問佢架車的維修費用呢？他說不用我支付
，因為我買了安心保險，維修費保險已經包埋，架車右邊車頭被撞到凹了，氣袋又彈了出來，我估都要賠償七八萬，現在竟然不用賠，真是好好彩呀
。另外，更加令我意外的事情，就發生在明天，現在買下關子先。
攪掂了OTS的事情，已經是黃昏，醫院亦為周老闆預備好床位了，病房都是在地下，只是在急症室隔離。個病房好大，約有15張床位，佢的床位在角位，感覺開揚D，同香港D醫院無乜分別，都係有一個櫃仔放嘢，有張椅，有D儀器咁。當時周老闆是第二個病人。
從早餐後，我們都無食過嘢
，現在好餓呀！醫院的小買部只有飲品及日用品，沒有可吃的。我就去詢問署問下，附近有無超市，個識員好好呀！帶我去醫院另外一面，話我知點樣行去。個超市在一個露天停車場的另一面，當時個天已經黑晒，周圍又鬼咁靜，我係一個好細膽的人，一路行個心卜卜跳，好驚呀！去到超市，好多熟食已經無乜，無可選擇下買了條蕃薯，2個飯團，一個麵包，一盒提子及一大支水。回程時，無頭先咁驚了，小沙B勁呀
。周老闆無胃口，不想食，其實，我都無胃口，但我一定要食，免得個胃不舒服，令佢更加擔心。
時間一分一秒地過，越夜亦越多病人入院留醫，病房已經有十個病人，呢個病房好得意，不分男女老幼的，之後的全部是老人。病人多了，寧靜的病房，亦開始噪吵了，但對隨時隨地都可以瞓的周老闆一D影響都無，佢瞓下醒下咁。
捱到去三點，見佢無乜特別，我又倦到頂唔住，問姑娘要了張被，行去了走廊，果度有D長椅，二話不說，我就好似D露宿者咁瞓低，好快我就睡着了，我是個好難睡覺的人，去D陌生地方更是，在呢D環境，咁快已經去搵了周公，可想而知，我是多麼的疲勞呀！瞓了個零鐘，入去睇下佢，佢當然是熟睡中，我出去再瞓多一陣先。
我感謝上天，令我們仍然活著，只受了小小傷，及體驗了驚險的一天。
經過今次事件，我發覺，我是個堅強及勇敢的人，只是平常有周老闆在身邊，我沒有發揮出來罷了。
沒有留言:
張貼留言