第11至16次電療 21-28 Oct 2011

做完十次電療後，周老闆口腔已經潰爛晒，現在已不能吞食固體及熱既食物，只能夠飲流質嘢仲要係凍嘢添，見到佢咁痛又咁辛苦，我好心痛，又幫唔到佢，不知點好。點會咁快就會變成咁，醫生及好多病友都話，大約電療20次後，先會有大反應及口腔潰爛，佢比預期快太多了，只是3日已經難已控制，不能食嘢，唉…求求你啦，比佢快D痛小D，唔好再潰爛下去啦！
第11次電療仍然係做早場即係8:00am，因為佢不能食嘢，所以就飲了支加營素當早餐再出發，隨身都帶住支冰水，口非常乾，仲有D口臭添。中午就吃攤凍了粥水，肚餓就飲營養奶，晚上佢已經唔想吃粥，話D粥剌喉，只飲鮮奶同營養奶。痛到瞓得唔係咁好。

星期六，終於可以休息二天了，晚上我就回外家睇兩老，周老闆都想見下佢哋，我覺得都好，趁佢外表仲未有變化及仲講到嘢前，見下佢哋，以免他們擔心，因再過一排，他應該不能與兩老見面了，到時我又要講大話，欺騙他們，話周老闆好忙要開夜。回家前，去了九龍塘間超市買食物，全部是流質及軟淋淋的食物，希望周老闆可以食到，可惜…佢都係食不下，因為喇喉。
呢D就係超市買嘅食物


第12次電療佢嘅早餐仍然是朱古力味加營素，個口痛到無心情講嘢，口臭嚴重，一開口已聞到D味道，D味道都幾難聞下，仲要時常吐口水，佢之前已經早晚都用鹽水嗽口，好像幫助不大。晚上瞓下又醒下，瞓得好差，今晚開始，瞓著後，流好多口水，枕頭都濕了，D口水既味道好難聞，幾臭下，每天早上要更換枕頭套。

第十三 次電療早上無胃口飲嘢，心情比昨天差，口臭更嚴重，唔想講嘢，我都唔敢惹佢，免佢勞氣，電療以來，心情最差就是今天了，全日都down down地。晚上瞓得好差，起了幾次身，要飲水同吐口水，休息得唔好，精神想好都難啦！個枕頭勁多臭味口水，大家一定要天天更換枕頭套，唔好比D細菌滋生，影響身體。

第十四次電療今次打後的五次，都是7:45am到醫院，好早呀！佢仍然無胃口飲嘢，但心情就好轉。電療完，佢話想去醫院內的pacific Coffe度凍飲咖啡，好多凍嘢佢都飲唔到，但就飲到凍咖啡，幾攪笑。跟住佢就見醫生，佢問醫生點解佢已切除鼻腫瘤，仍然同其他病友一樣，要做33次電療，醫生話啱嫁，係咁做嫁，叫佢唔洗擔心，又話口腔潰爛都係正常嘅，因為口腔滋生了細菌，醫生就開了一個星期抗生素比佢服用，一支嗽口水，幾排嗽口用的藥片，放在水裡溶解後含口，再加5大支Panadal 止痛水比佢。返到屋企，佢好忙碌，要跟足指示2小時交替咁用D嗽口水及嗽口藥片及吃抗生素。

第十五次電療
可能吃了藥及嗽了口，情況有所改善，無咁痛了，飲了包鮮奶做早餐，電療後仲去了Starbucks飲凍咖啡。而今天，他發覺頭髮開始甩了，電療的位置在面部右邊，他用手輕輕一抆，就會有一大執頭髮甩，都幾多下，佢嫡水的位置本來好濃密，但現在已經左右高低立見了，遲D可能甩得仲勁，不用去剪髮了，慳番D剪髮錢。  

第十六次電療
個口好番好多，之前條俐被細菌感染到損晒及長滿俐苔，今天條俐靚番了小小，俐苔減少了，可以見到小小粉紅色，痛楚亦減少了，晚上可以喝粥水。可能吃了抗生素及止痛藥，佢好疲倦，九點幾已經睡著了。

雖然佢痛到無胃口進食，每天只飲速癒素、鮮奶及加營素做代餐，但佢無乜點瘦，健康狀況都OK。
佢每天的餐單:早晚一包速癒素，午餐及晚餐就雲呢那味加營素開水，Tea time and宵夜就是 罐裝朱古力味加營養，再加1-2杯鮮奶，咁飲發更係無乜減磅啦，成肚都係水份！無辦法啦，佢唔飲咁多，又覺得肚餓。
所以大家如無法進食，一定要飲營養飲品做代餐，增強抵抗力，增加營養！咁至可以對抗D病魔嫁。今個星期，佢開始容易疲倦，這個也是電療後反應之一。太好了，今日是星期六，不用到醫院電療，可以休息2天

左邊濃密的嫡水                                                                                                          

 

右邊稀疏的嫡水

輕輕一抆，甩掉的頭髮

第6至第10次的電療 14-20 Oct 2011

周老闆已經電療了十次了，這幾次的時間都是八點或八點十五分，所以每天都好早出發到醫院。因為太早出門，沒有吃早餐，所以會先飲一包速癒素頂住先。
這五次電療的時間大約做半小時，九點鬆D就會做完。
第六次電療他覺得個鼻有D腫脹

第七次電療覺得條頸有D痛及感覺有小小發熱

第八次電療舌頭發白，兩邊有小小損，好似生飛滋咁，口開始好乾，要不停飲水

第九次電療口腔、喉嚨開始痛，胃口亦差了，不想食嘢，只想吃粥，仲要係攤凍了嘅粥，可能咁樣食落去會舒服D，這次見了醫生，醫生話正常，電療後會有這些反應，如果太痛就開D止痛藥水比佢食，個鼻至胸口對上D皮膚亦開始有小小變深色了

第十次電療已吃醫院的止痛藥水，但痛的程度沒有減少，他要不停飲D冰凍既水或飲料，以減低口乾及痛楚。
今天他還到醫院聽鼻咽癌講座，聽完佢都覺得有幫忙，更加了解電療後的副作用，如遇到其他的身體變化，應該怎樣去處理等。個講座都有好多病友聽，姑娘講解完，仲有過來人來分享經歷添。聽完講座，仲送你一個禮物包，裡面有好多野，D野都幾實用，有牙膏、牙刷、牙線、嗽口水、水樽、香口膠、還有一支搽口腔的啫哩，及一本資料書添。

現在佢要時時刻刻都要帶支水在身邊，而且仲要係冰水，用膠樽又不健康又會有倒汗水，所以就去買了個可以裝熱水，又可以裝冰水的不秀鋼保溫壺，個壺真係無倒汗水，D冰水仲可以Keep到幾小時添，貴嘢品質的確係好D嫁。我都建議病友們可以考慮買個呢D壺，真係幾方便，冷又得熱又得。

醫院送的禮物包
 下午，我們就到中建大厦覆診，診所好多病人，等了個半鐘至到佢。袁教授先同佢檢查個口，我在大電視度見到佢個口腔白晒好多位置損晒，喉嚨後面潰爛晒，唔怪得咁之痛，食嘢都困難啦！教授都話佢D反應來得快，我問教授可否開D止痛藥，因為醫院開的止痛藥(Panadol 水)根本止不到痛，佢呢D痛楚普通藥又怎能足夠呀！跟住就再檢查個鼻，手術後，每個星期都會Keep住去覆診，所以個傷口沒有問題，復原得好好，所以，可以二星期至回去覆診了。

睇完醫生後，我們就去了吃日本嘢，因為佢可以吃稻庭冷烏冬，吃凍嘢佢就最舒服。教授開的二隻止痛藥

 

 

 

 

慶祝小沙B生日

今日是小沙B四十歲生日的大日子，今日是最近過得最開心的一天，好開心好愉快呀！真係要多謝周老闆為我預備的一切。

佢成日話自已係個粗人，乜野都唔識，其實佢謙姐，朋友同佢相處過，就知佢係一個幾有內涵的人，佢不會自誇，朋友遇到問題會盡力幫助，亦懂得去關懷別人，更重要是佢係一個孝順仔，而對我，佢簡真無得頂，心中永遠都放我在第一位，我比佢攪到我有公主病添，小沙B公主並不是浪得虛明嫁，我D公主病只會在周老闆身上發的。每次有特別日子或記念日，他都會好花心思去預備，今次亦不例外，其實我真係無想過點去慶祝，只是想等佢D電療副作用未出來前，同佢去食餐好既。

今早我們要同老豆入院，所以就開了鬧鐘，當鬧鐘一響，我當然是望下個鐘啦！我當然是順手去關啦！我一望向個鐘，就見到有一個西武紙袋在檯面，唔駛講就一定係送給我的生日禮物啦！唔怪得昨晚鬼鬼鼠鼠偷蕃薯咁啦！佢起了幾次身，原來是要放份禮物在床頭。個西武紙袋上寫住【福袋】，原來內裡有八份禮物，加張生日咭。每拆一份禮物，你就會知道佢對我是多麼的上心，因為有D禮物是我最近同佢逛街，拿上手看過但無買的東西，佢一一記在心，之後佢就分別去了幾處地方買回，就是這份心意已經甜在心頭啦！

我的生日禮物 

福袋內有 ( i  Phone 套、Head  Phone、扣住head phone的夾、2把超趣致的傘、髮夾  、親手摺的心心介指、西武Coupon，生日咭

Ps: 張生日咭還可以用來對換名表一隻添，哈哈哈

掛住拆禮物，耽誤了D時間去醫院，只好搭的士啦！兩老當然又係一早到了啦！今次去八樓內科部入院，辦妥手續及做了D基本檢查後，因還沒有床位，姑娘批准老豆落餐廳吃午餐，餐廳D食物唔係好得，等到有床位已經二點鐘了。陳太就回家休息，我們就到沙田新城市廣場逛街街，果度成日都人頭擁擁。逛了一陣就找了間雪糕店坐下，休息下，吃了杯芒果雪芭，好好味。

再逛了一陣，我們就起程去吃晚餐的地方，大埔小白露餐廳，坐火車到大埔火車站再轉乘的士，的士費用是$23。我們都係第一次到，成日聽人講好似好靚咁，但當去到時，覺得只是一般姐。那裡有一間餐廳，天台可以BBQ，是但無人燒窩，一間買記念品的鋪頭，有幾隻山羊的公園仔，及比人撐艇的湖，湖上有間小白屋，可以租來過2人世界。

比人撐艇的湖及小白屋

本來想坐在出面露天餐廳吃晚餐，但周老闆就話晚上會有蚊，後來就坐裡面，以免成為D蚊既晚餐。餐牌上的食物種類不太多，套餐有餐湯、甜品、餐茶送，我就要了龍蝦意粉，周老闆就要燒豬手。賣相好好，份量都十足，我就覺得龍蝦比較鹹，個豬手就好好味道。食晒D野Hea緊既時候，突然間，個經理拿住個心太軟蛋糕出來，上面插了支洋祝，碟邊仲寫住《Happy Birthday To Cindy 》，嘩好開心呀！有蛋糕切，個蛋糕是他定位時已Order定的，本來佢想要拿破崙，小白露沒有才要心太軟。飲飽食醉後，就要Call的士來接我們，因為那處實在太偏礔了，門口就有個Counter寫住Call的士的電話，又幾細心。

露天餐廳

餐廳裡面

晚餐及生日蛋糕

他已經病緊，還為我預備咁多野，花咁多時間及精神，真係辛苦佢了。
我覺得這個男人，是上天送給我的天使，我好開心、好快樂、同覺得非常非常幸福。

小沙B 40歲

明天就是小沙B的牛一，嘩嘩嘩…咁快就四張嘢，都唔好話唔得人驚。
之前，我都有想過下要點樣去慶祝這個日子，人哋話女人四十歲是個大關口呀！而且今年十月份有一個更好的事情，想同生日一齊特別慶祝。這件事，真係要好好地慶祝一番，小沙B終於於四十歲供滿層樓，有物業在手了…哈哈哈，心情真係非筆墨能形容，太好了，真係開心到振呀！
但最近發生太多事情，我實在好忙，忙到個人真係好倦好倦，根本都無心情去想怎樣慶祝，而且明天老豆仲要入威爾斯醫院，預備做射頻手術，更加影響心情喇。想都無想要怎樣過明天，我已安排的是我會同老豆入院，跟住同媽媽吃個午餐，多謝佢帶我到這個世界，給我溫暖的家，之後就明天再算。

唔知係年紀大了定係最近太操勞，少了休息，對腳好唔聽說，前幾天仲抽筋添，痛到我死下死下，呢幾日行都唔想行呀！點算呀！仲有好多嘢等我做嫁，上天請你體恤下我！比我強壯D，繼續樂天地面對所有事情喇！

第2至第5次電療 10 -13 Oct 2011

今天已經接受了第五次電療，一切都好好，周老闆未有特別反應，亦沒有不適，只是這幾次的時間非常之早，每天都是8:00am，我就要6:30起身，大約7點出問門，在附近吃完早餐至行去醫院。星期五仲早呀！是7:30am，攪乜呀！病人唔係要多D休息嫁咩，約人咁早，點樣休息同有足夠睡眠呀！無辦法啦，病人實在太多了，我都明白的，我只是發下嘮騷。

昨天電療完畢，周老闆要見皮膚科姑娘，她講解下電療後會出現的情況，如皮膚潰爛怎樣處理，可以買支電療寶Radia Gel，保護D皮膚，而頭髮的髮尾位置會脫落，口腔亦會潰爛，可以用鹽水或沒酒精成分的漱口水漱口，醫生都開了支比周老闆，而飲食方面，要多吃高蛋白質的食物，蛋白、麵包、每天都要吃幾兩肉類，2-3星期後有D病人會漸漸失去胃口，食唔落嘢，會嘔吐，嚴重的吃不到食物，要到醫院打營養素添。因為是第一次見姑娘，所以都見了半個鐘。之後又要見醫生，見醫生就當然無咁順利喇，等就等了個半鐘，見就見了5分鐘，哈哈，真押韻。
開始電療後，他已經停止睇中醫飲中藥，之前已有好多朋友建議佢食雲芝產品，一講患癌症食雲芝，發覺都係講這個牌子(百草堂雲芝精華)，原來好多人都係食呢隻，支雲芝都幾貴下，500粒要四千蚊，會員有九折，要每日食3次，每次服3粒，還要餐前服添，呢個係做電療服的份量，如是其他的疾病或是用作保健，就要詢問番百草堂點樣服用了。早上同晚上周老闆就會記得食，但中午的一餐就會時常都忘記。有好多人食住佢去電療或化療，好似副作用減少了，我都希望佢會係咁。好多嘢有人試過或者話work嘅，我都會考慮比佢試下，我希望佢在電療的過程唔會太辛苦，唔會有太多不適的情況。
PS:在醫院裡賣醫療用品的鋪頭買嘅電療寶，價錢是$98
電療寶

醫院開的漱口水

百草堂的雲芝精華

第一次電療 7 Oct 2011

今天會比較忙碌D，早上要到中建大厦覆診，下午就到伊利沙伯醫院做電療。
下午我就請了半天假，陪伴周老間，我們先食一個豐富的午餐，間餐廳我都是第一次幫襯，在佐敦道聖地牙哥酒店地下，都OK嫁。

午餐


午餐後我們就慢慢行去醫院，到達醫院R座後(R座是腫瘤科大樓)，首先到繳費處交錢($100)，之後就跟指示去二號放射治療機，那裡有一至七號治療機，昨天己有人通知他是在二號機的。去到就將收據及黃咭放到只定位置，有工作人員會跟進的。黃咭是一張有個人資料及有空格的咭，D空格是用來寫上下次電療的日期及時間的，都幾清楚嫁。

黃咭

第一、二及七號放射治療機大堂

交低黃咭，我們就坐低等，無耐就有個職員來同我們講一陣D程序。首先就是換上醫院的紫色袍，條帶向後，不用綁，外面可以穿自己的外套，以免着涼。然後都係繼續等，那裡是收不到電話訊號的，大家注意啦！在等待期間，我做了個小統計，如果是舊症，入去做電療大約需時15分鐘，當然不計等待的時間，而一個小時都可以做四個病人。周老闆約的時間是2:45pm，等了一個鐘，有個工作人員叫佢個名，我估個工作人員應該是放射治療師，佢就話下一個輪到佢，因為佢係第一次做，所以時間會長D，大約要做45mins，要去洗手間就先去，同埋如果一陣做緊電療時，唔好郁動，要保持姿勢，如有問題就舉高手，他們就會暫停。

3:35pm他就跟隨幾個治療師入去了，我在出面等待都幾辛苦，因為始終第一次做，唔知會發生D乜嘢事，我個人又鐘意亂想嘢，成日都想埋D無謂嘢。3個字後，D治療師出番嚟。之後他們lock住個入口，不准任何人進入那間房，之後天花板上的紅燈亮起了，大約維持了幾分鐘，之後又熄了，這個程序應該是己開始替他電療，跟住他們又再入去，過一會又出來，又再Lock入口等程序，如是者重複做了以上動作幾次。
就是這個入口


治療師出來後，Lock 入口，天花板亮起紅燈，電療正在進行中

4:30pm，有個治療師出來叫有無周XX的家人呀！我在呀！他話今日的電療己完成，一陣佢就會出來，叫我放心，另外就再同我講，話周老闆的電療次數及時間，頸部要電33次而鼻就電30次，因為他睇的那組醫生，星期一同星期三會早上睇症，所以亦安排了他上午做電療，本來我希望可以安排下午做，咁我就可以放下午陪伴他，照顧他，現在早上做，我就可能難D安排了，無辦法啦！到時睇下他的情況至再安排啦！
無耐就見到周老闆行出來，問佢痛唔痛，佢話唔痛，表面無乜嘢，一切正常，因為要帶上頭模及頸模，所以有D好細嘅格仔印在面上及頸部。佢手上拿住一個番梘盒，裡面有條橙色嘢起度，原來呢條就係上次漏做了的塞鼻模，條嘢要自己保管，每天都要帶回去做電療嫁。

照佢面型而做的頭模 (獨一無二的)

鼻模

回家途中，我問佢，佢究竟在裡面做了D乜嘢？佢話先睡上床，再用d KY gel搽下條鼻模，再塞入鼻內，跟住帶上頭模，鎖上鎖，固定位置，會有D壓縮感，跟住D工作人員就走開，無耐就聽到D隆隆聲，就係咁。
電療後的感覺
平時周老闆太約12點睡覺，但今晚他10點己經上床Hea，無耐仲睡著了添，可能電療後會疲倦D，但是有一樣嘢就比較奇怪D，自從做完手術後，他已經沒有了鼻鼾聲，但是今晚D鼻鼾又出來了，究竟關唔關事，我就要再研究下及問下醫生。

終於接到醫院電話了

今天早上伊利沙伯醫院終於打電話來了，問周老闆可否11:00am回到醫院再mark多次位置，及明天下午2:45pm做電療。等候呢個電話真係剛剛好是四個星期，醫院真係無講大話，話等四至六星期就真係咁上下。可能十月頭太多假期，醫院通知唔切病人會，所以會咁突然，話明天就做電療，無所謂啦！反正都係預備隨時就做，但是希望早幾日通知，我們有所安排，例如佢去剪頭髮，約朋友見下面，我還要同佢去食好D，等佢食D好美味既食物，因為佢好鐘意食野嫁，我驚佢第日無胃口食野呀！

做電療前5日，D速癒素就要每天飲3次，現在就不能夠跟住做了，好彩個幾月前前我已經叫佢早晚飲一包姐，好在已打了底，希望電療後遺症對佢無乜影響啦！
請保佑他啦！

老豆出院了

 老豆真係醒啊！入院又揀假期(十月一日國慶假期)，出院都係揀假期(重陽節)呀，令我們好方便同更好準備。醫生一早去巡完房就話今天可以出院，老豆就打電話比陳太，陳太就打比我，但我昨晚忘記將個電話開番大聲，miss咗了幾個call，好彩陳太醒，打電話比周老闆，唔係就大件事，點解佢唔打來屋企，可能驚嘈親奶奶。

去到醫院姑娘解釋了現時老豆的情況及出院後的跟進，好快就可以落一樓會計部比錢及藥房攞藥，可能是假期一樓無乜人，前後5分鐘就攪掂。老豆今次住了5日4夜，只需要$四百大元，張收條會列印埋如果你不是香港居民的收費要$14,000，$14,000我覺得價錢都幾OK，因為醫院真係提供好多設備及醫護人員，如果這次在私家醫院一定更加貴。                   

老豆肺炎入醫院

十月一日國慶有二天假期，本來想同周老闆去離島逛逛，最後都沒有成行，唉真係黑到無人有。一號早上六點幾手提突然響起，陳太（我媽媽）喊住話老豆好唔舒服，好辛苦，已經叫了白車，聽到佢咁講我都好驚，立即起身，擦一擦牙就出門，當你越急就越無的士，周老闆叫我放鬆d,點放鬆呀，個天又玩我呀！最近去醫院的次數多到我都忘記了。

去到威爾斯醫院醫院急症室又見不她們，去問至知佢哋未到，打電話又無開機，真激死人，個心真係振晒，七點三陳太再打電話來，話救護員已替老豆撿查，初步是發高燒，所以發泠影響埋心口痛，現在她們先由馬鞍山出發到醫院，原來發高燒，咁都無咁驚。她們到達醫院已經是七點半，原來Call白車都未必快過自己坐車到醫院，當然白車上有救護員又有儀器，有急病當然要Call啦，如果不太緊急，當然是自行到醫院或到私家診所啦。我老豆係一個好怕麻煩人的老頑童，如果唔係好辛苦，佢一定唔會Call 白車，佢都係第一次坐白車。

坐白車到的病人會被優先處理的，救護員會同急症室的護士交待老豆病情，護士問老豆邊度唔舒服，之後替老豆量體溫(38.4度)、血壓再做埋心電圖。做完檢查就等見醫生，醫生話老豆可能是受細菌感染，所以突然發燒，要入院觀察，還要照肺及驗血。在急症室攪到差不多十點半至上到病房，其實都好快了，因為有好多病人等候床位呀！可能老豆是內科所以有比較快D，原來D病房都好Full下,因為有D病人要睡在走廊，老豆真係好彩。

上到房再有醫生睇老豆，而醫生就話老豆是肺炎，所以發高燒，會同佢打抗生素，比氧氣佢聞，等佢條氣順D，仲有就係在佢床邊放了一座空氣淨化機，好大部的，老豆不能夠落床，不可以自由活動，佢覺得咁樣好辛苦呀！好彩可以食野，唔係佢仲難頂呀！因為佢係大食怪呀！

經過了幾日的治療，今天已經退燒了，醫生話如果明天進展繼續良好，可以出院添，太好了，咁陳太就唔洗咁辛苦，因為她在中午及黃昏要帶一D愛心粥到醫院。

就快放工了，我亦都要趕住去醫院見一見我老豆，仲要去買一D佢鐘意食的麵包比佢做宵夜添！哈哈